Portada Convocatories Miles de persones glayaron nes cais d’Uviéu pola Oficialidá

Miles de persones glayaron nes cais d’Uviéu pola Oficialidá

by redacción asturnews

La Xunta pola Defensa de la Llingua, sofitada pola sociedá civil, los partíos políticos, cola esceición del PP, y tolos sindicatos asturianos algamaron la mayor manifestación dende va años na xornada del Día de les Lletres. Un vienres pela tarde que ye una cita simbólica qu’amuesa la reclamación del drechu democráticu ya institucional que queda por algamar n’Asturies.

Foron más de 4.000 persones, según cifres de la Policía, les que percorrieron esti vienres soleyeru les cais d’Uviéu pa reclamar otra vuelta la oficialidá del asturianu cola presencia de políticos del PSOE, Podemos, IX y Foru y los sindicatos CC OO, UXT, CSI y USO. Concha Masa y Ovidio Zapico foron los representantes d’IX, Segundo González de Podemos, Mari Lluz Pontón y María Fernández  de la FSA-PSOE ya Ignacio Iglesias  de Foro, pero munchos otros pudieron vese pente la manifestación. Los mentaos fueron la cabeza visible de les sos formaciones nesta marcha y coincidieron en destacar la tresversalidá d’esta vieya reclamación.

La manifestación entamó a les siete y media de la tarde na estación de Renfe y percorrió la cai Uría sol lema “Asturianu llingua oficial ¡Yá!”. Gaiteros y pandereteres punxeron otra vuelta l’animación a una tarde na que’l bon tiempu animó la xornada, anque sin movilizar a tanta xente como’l sábadu 21 d’abril.

Y como ye vezu, al aportar al Teatru Campoamor, onde se celebraba l’actu central del Día de les Lletres Asturianes pudo sentise la reclamación d’oficialidá que cada añu fai la Xunta pola Defensa de la Llingua Asturiana. Sintieronla’l secretariu xeneral de la FSA, Adrián Barbón o l’alcalde d’Uviéu, el tamién socialista Wenceslao López. Dambos tuvieron falando amigablemente colos promotores de la manifestación amosando la bona sintonía qu’hai na sociedá cicvil y na mayoría política d’anguaño.

Tamién te podria gustar