Portada Lliteratura Miguel Rojo publica un nuevu llibru de poesía

Miguel Rojo publica un nuevu llibru de poesía

by asturnet

L’escritor Miguel Rojo acaba de publicar un nuevu llibru de poesía embaxo’l títulu de ‘Llaberintos’. El conxuntu de poemes conteníu nel últimu títulu del autor de “Hestories d’un seductor” presenta una voz fonda y confidenciada que busca al través del regueru de les palabres la complicidad de los llectores.

Los versos de “Llaberintos”(Trabe, 2006) comparten cola so poesía anterior el tonu meditativu y la reflexón autobiográfica, y mantienen un estilu coloquial que caracteriza al autor ente los poetes asturianos, alloñáu de la retórica, pero capaz de sorprender con un llinguaxe vigorosu, ricu n¹imáxenes, col que¹l poeta se reinventa a elli mesmu mientres axusta cuentes, n¹intelixente diálogu, col mundu que lu arrodia.

Miguel Rojo (Zardaín, Tinéu, 1957), bien conocíu como narrador, mostró dende siempre¹l so inclín poéticu, a pesar de que nun publicó en llibru hasta l¹aparición de “Buscador d¹estrel.las” en 1996. Sicasí, yá paez antologáu en “Poesía última asturiana” (El Ciervo, 1986) o na Muestra corregida y aumentada de la poesía en Asturias, de 1989. Nel 2001 publicaba un segundu y formosu llibru, “Bilbao estación terminal”. El volume editáu agora: “Llaberintos”, ye’l so tercer poemariu.

Tamién te podria gustar