Portada Sociedá Miguel Falomir va ser el nuevu director d’El Prado

Miguel Falomir va ser el nuevu director d’El Prado

by redacción asturnews

Miguel Falomir Faus foi designáu esta selmana candidatu pa sustituyir a Miguel Zugaza como director del Muséu del Prau, como espertu que ye en pintura italiana del Renacimientu y dende xunu de 2015  director adxuntu de Caltenimientu ya Investigación del Muséu.

Doctor n’Hestoria del Arte y profesor titular, en excedencia, del Departamentu d’Hestoria del Arte de la Universidá de Valencia, la so propuesta de nomamientu a lo más responsable del Prado coincide col 20 aniversariu del so ingresu nesti muséu, que lu fichó en 1997 como xefe del Departamentu de Pintura Italiana y Francesa (hasta 1700).

En tou esti tiempu, según el muséu, Falomir (Valencia, 1966) llideró “una perimportante meyora” nos estudios sobre les colecciones de pintura italiana del Renacimientu, a la que dedicó dellos llibros y más d’una cincuentena d’artículos publicaos n’Europa y Estaos Xuníos. Amás, hai promovido la restauración d’importantes obres de Tiziano, Tintoretto, Veronese o Rafael y hai comisariado esposiciones dedicaes a Tiziano, Tintoretto, a la semeya na Renacencia o al postreru Rafael.

Llicenciáu en 1989 na Universidá de Valencia, con premiu estraordinariu, dende 1990 hasta 1993 foi becariu nel Conseyu Cimeru d’Investigaciones Científiques. Doctorase en 1993 y ente 1994 y 1995 esfrutó d’una beca Fullbright posdoctoral nel Institute of Fine Arts de la Universidá de Nueva York.

Unu de los principales retos que va tener per delantre como director del Prado va ser el bicentenariu del muséu, que se va celebrar en 2019. La pinacoteca foi inaugurada un 19 de noviembre de 1819 col nome Muséu Real de Pintures. Güei ye unu de los museos más importantes del mundu y l’añu pasáu recibió na so see más de tres millones de visitantes, un 12,50 % más qu’en 2015.

Tamién te podria gustar