Miguel Barrero ye’l nuevu presidente de la Federación de Gremios d’Editores

Miguel Barrero ye’l nuevu presidente de la Federación de Gremios d’Editores
08 xineru 10:08 2019 Imprimir

L’asamblea de la Federación de Gremios d’Editores d’España (FGEE) escoyó por unanimidá a Miguel Barrero, director xeneral d’I+D+i del Grupu Santillana, como’l so nuevu presidente, un cargu nel que releva, en cumpliendo’l so mandatu, a Daniel Fernández, sigún informó recién la entidá nuna nota de prensa.

Según la FGEE, que tamién anovó la so xunta directiva pa los próximos trés años, el nuevu presidente marcóse como oxetivu principal “la puesta en valor del llibru, la llectura y del papel del editor na vida cultural y na sociedá de la Conocencia y d’Internet”.

Barreru, que ye amás director d’Educación de la Fundación Santillana yera hasta’l so nomamientu presidente de l’Asociación d’Editores de Madrid y ye llicenciáu en Ciencies de la Educación y máster en Nueves Tecnoloxíes de la Información y la Comunicación.

El nuevu presidente esplica nel comunicáu de la FGEE que estructurará la so xera en redol a exes como la llucha contra la piratería; la meyora de la internacionalización del sector; la defensa de “un texíu de llibreríes” y un mapa de distribución que garantice l’accesu a la llectura y el compromisu con “les situaciones específiques de los distintos tipos d’edición”.

La FGEE creose en 1978 pa la defensa de los intereses xenerales del sector editorial y na actualidá representa a los gremios de Madrid, Catalunya, Euskadi, Andalucía, Galicia, Valencia y Castiella y Llión, amás de l’Asociación Nacional d’Editores de Llibros y Material d’Enseñanza (ANELE) y la Associació d’Editors en Llengua Catalana (AELLEC).

  Categories: