Mieres súmase al proyectu “Asturies, Capital Mundial de la Poesía”

Mieres súmase al proyectu “Asturies, Capital Mundial de la Poesía”
09 xineru 08:33 2020 Imprimir

Mieres vieno acabante sumase al proyectu “Asturies, Capital Mundial de la Poesía” amosando’l sofitu institucional y empecipiando una recoyida de firmes ciudadana pa impulsar esta acción cultural.

El Conceyu de Mieres sumase al proyectu “Asturies, Capital Mundial de la Poesía”, una acción que tien como oxetivu dar a conocer Asturies dende l’ámbitu de la so cultura y la so sociedá. Una iniciativa, impulsada por Graciano García, que cunta col respaldu de numberoses persones, instituciones y organizaciones, ente elles la Xunta Xeneral del Principáu, y na que tamién va collaborar el Consistoriu mierense al traviés del sofitu institucional qu’alcordaron tolos grupos municipales (IX, PSOE y PP).

Amás del sofitu del Conceyu, l’oxetivu ye que la ciudadanía pueda tamién sumase, polo qu’a partir d’esta selmana va empecipiase xuna campaña de recoyida de firmes por que vecines y vecinos que lu deseyen puedan ufiertar el so respaldu a esti proyectu. Nesti sentíu, cabo destacar que son yá numberoses les persones que dende distintes partes del mundu xuntáronse a “Asturies, Capital Mundial de la Poesía”, esperando llegar a les 10.000 pa una acción que pretende que los versos tomen les cais asturianes nel próximu Día Mundial de la Poesía que se celebra en marzu.

“Creemos que tolo que sía promocionar Asturies dende distintos ámbitos como’l cultural y social ye positivu y por eso entendimos que Mieres tien de collaborar ufiertando’l so sofitu”, señalábase dende la corporación, dende onde s’informa de que nos próximos díes les distintes y dependencies municipales (Conceyu, Casa de Cultura…) van tener fueyes de firma pa sofitar esta iniciativa. Toes aquelles persones que roblen van recibir un carné como fundadores d’esti proyectu.

Loading Facebook Comments ...