Mieres convoca’l XXXI Premiu Teodoro Cuesta de Poesía n’asturianu

El Conceyu de Mieres, pente medies de la conceyalía de Normalización Llingüística que dirixe Belén Alonso, informa de que´l Boletín Oficial del Principáu d´Asturies (BOPA) publicó ‘l 13 d’ochobre, l´estractu de la convocatoria del Premiu Teodoro Cuesta de Poesía en llingua asturiana na so XXXI edición.

Trátase d´un de los galardones más emponderaos de la poesía n´asturianu, dotáu con un premiu de 4.000 euros. Según consta nes bases , podrán participar toles persones que lo deseen con un poemariu inéditu, orixinal y escritu en llingua asturiana. Estos trabayos -orixinal y cuatro copies- entregaránse , firmaos con alcuñu o lema y con un sobre zarráu colos datos y breve biografía del autor o l´autora, por corréu postal a la Secretaría de la Casa de Cultura de Mieres o pente medies de la Oficina del Rexistru Xeneral Municpal del Conceyu de Mieres.

El plazu de presentación de los poemarios sedrá de 15 díes hábiles  a cuntar dende la publicación d’esta convocatoria. Tola información d´esta convocatoria pue consultase nes bases, publicaes el 27 de setiembre nel BOPA y también nel enllaz de la web municipal: https:/www.mieres.es/cultura/concursos-certamenes-premios/premiu-teodoro-cuesta-poesia/

El Premiu Teodoro Cuesta cunta nel so palmarés con autores de prestixu de les lletres asturianes como Berta Pián , Xuan Bello o Vanesa Gutiérrez.

Más información: https://www.mieres.es/cultura/concursos-certamenes-premios/premiu-teodoro-cuesta-poesia/