MIAS afítase contra la relixón na enseñanza y los conciertos educativos

La Mocedá d’Izquierda Asturiana (MIAS) manifiesta la so postura contraria a la presencia de l’asignatura de Relixón na enseñanza pública y a la concertación por parte de l’administración educativa de los conciertos con centros privaos. La organización nacionalista moza pide que se supriman les subvenciones públiques a la enseñanza concertada.

Según Carlos Suari Rodrigue, voceru de MIAS: “la reforma de la Llei Orgánica d’Educación tendría que sofitase en dos finxos básicos: una enseñanza pública, onde toes y toos tengamos los mesmos drechos y posibilidaes, y, per otru lláu, que seya dafechamente llaica y de calidá”. Suari posicionose escontra’l gobiernu del estáu español y el primer partíu de la oposición por, según elli, “facer d’un debate tan importante como’l de la educación un espectáculu llaceriosu y una guerra eleutoral de votos”.

El portavoz de MIAS atacó, per un lláu, “l’estremismu col que, dende la ultraderecha española, se tan calteniendo postures indefendibles” -refiriéndose a la polémica colos conciertos y la docencia de relixón católica en centros d’enseñanza públicos- “nún estáu supuestamente aconfesional y que debiere ser llaicu”.

Pa les mocedaes d’Izquierda Asturiana “el gobiernu estatal debe suprimir los conciertos, ye dicir, les subvenciones con perres públiques de tolos ciudadanos, a los colexos privaos, centros nos que se prioricen los alumnos, de tal mou que conderguen a la enseñanza pública a ser la de los desfavorecíos”, términu, esti caberu, emplegáu por cares visibles del PP recientemente n’Asturies. Amás, pa Suari “ye irónico que, precisamente, los profesionales meyor preparaos seyan despreciaos frente a los de los centros privaos”.