Mendoza recibe’l Cervantes como un premiu al humor y con retranca abonda

Mendoza recibe’l Cervantes como un premiu al humor y con retranca abonda
21 abril 09:18 2017 Imprimir

“Nos mios escritos practiqué con reincidencia’l xéneru humorísticu, y taba convencíu de qu’eso me pondría a salvo de munches responsabilidaes. Yá veo que me equivocaba”. D’esta miente entamó Eduardo Mendoza el so discursu  por cuenta del llogru del premiu Cervantes, que recibió esti xueves de manos del rei Felipe VI na Universidá de Alcalá de Henares.

Nuna repasada de les socesives llectures del Quixote a lo llargo de la so vida, l’autor de La verdá del casu Savolta y La ciudá de les maravíes entamó por recordar la primera que fixo de cabu a rabu cuando, siendo él estudiante del llamáu Preu (el cursu preuniversitario), “a diferencia de lo qu’asocede güei, la educación humanística prevalecía na enseñanza, en desterciu de la conocencia científica y “de conformidá col lema entós vixente: ‘Qu’inventen ellos”.

“De la mesma -indicó-, la pomposa astracción que güei denominamos Humanidaes antes llamábase, humildemente, Cursu de Llingua y Lliteratura. Pa los mios compañeros de cursu y pa mín, entá más humildemente, la clase del Hermanu Anselmo”, añedió ente rises. Eduardo Mendoza estudiaba entós nun colexu allugáu “nun edificiu pervieyu, de lladriyu escuru, fríu pel hibiernu, nuna Barcelona bien distinta de la que ye güei”. Y en la clase de Lliteratura aprendió coses que, aseguró, nun-y sirvieron enforma pero gustó-y aprender y gústa-y recordar. “Por casu, la diferencia ente sinécdoque, metonimia y epanadiplosis. O qu’un sonetu ye una composición de catorce versos a la que siempres-y sobren diez”. Más sorrises.

Recordó l’escritor cómo per aquellos años la figura del Quixote fuera “secuestrada” pola retórica oficial pa convertila n’arquetipu de la nuesa raza y el adalid d’un imperiu de fanfarria y cartón piedra”. Solo o con Sancho Banduyu, a cuerpu o a caballu, esa figura vender a la gruesa” n’estaciones y aeropuertos y en munchos llugares taba presente como ceniceru, pisapapeles o apoyalibros: “Males tarxetes de visita pa un aspirante a superhéroe”.

El ganador del Cervantes, dotáu con 125.000 euros, lleó’l Quixote per segunda vegada cuando él yera lo qu’en tiempos del propiu Alonso Quijano “llamábase bachiller, quiciabes llicenciáu… Lo que güei se considera un mozu cualificáu y lo qu’en toles dómines llamóse tontu”. Mendoza “llevaba’l pelo revueltu y llucía un fieru bigote”, aseguró. Yera “ignorante, inespertu y pretencioso”. Y aspiraba a lo mesmo que’l caballeru de la murnia figura, “correr mundu, tener amores imposible y desfaer entuertos”, señaló tamiénpa finar.

  Categories: