Mediu millar d’escolares van conocer la hipoterapia d’El Asturcón

by redacción asturnews | noviembre 14, 2017 4:53 pm

El Conceyu d’Uviéu recibió hasta agora 72.619 pidimientos pal anováu programa de cuarenta y cinco actividaes extraescolares del primer trimestre, de les cualos trelce son nueves. Ente elles, destaca la que se va realizar n’El Asturcón, col serviciu d’hipoterapia, denominada ‘Toos iguales, toos distintos’.

Pa esti serviciu d’hipoterapia realizáronse 9.941 pidimientos y aprobáronse 572. Solo esiste una extraescolar con más demanda: la educación vial pal primer trimestre, qu’atropa 10.695 pidimientos y va impartise a 3.362 estudiantes. La tercer iniciativa con más ésitu ye la campaña de títeres, pa la que s’apuntaron 5.742 persones y esfrutar 2.702.

Hai más actividaes nueves, amás del yá realizáu espectáculu ‘Los magos de les palabres: Miguel y Federico’ del qu’esfrutaron 943 chavales. Ente elles tán dos talleres de comer sanu, que van llegar a 1.012 persones. La concejala d’Educación, Mercedes González, aprofió que «los vezos pa una alimentación saludable, como munchos otros, tienen de conocese y adquirise dende los primeros años».

Amás, los neños empezaron yá a visitar el conxuntu arquitectónicu de la fábrica d’armes de La Vega y allegaron a la esposición de Médicos ensin Fronteres ‘Siguir con vida. Tamién, van tener un taller con cuentu tituláu ‘Bintouy y yo’ y van conocer les instalaciones del Vivarium de La Corredoria y de la Turria de La Ería.

Nel conxuntu del cursu pasáu entamáronse un total de 66 actividaes extraescolares de les qu’esfrutaron 74.678 escolinos. Pal 2017-2018, el primer trimestre yá aumentó en dolce’l númberu d’eventos respecto al añu pasáu.

Source URL: http://asturnews.com/mediu-millar-descolares-van-conocer-la-hipoterapia-del-asturcon/