Los testimonios ciudadanos van sirvir de base pal mural dedicáu a Uviéu

La campaña realizada conxuntamente por Parees, el Festival d’Intervención Mural d’Uviéu, y l’Área de Participación Ciudadana del Conceyu pa la realización d’un mural dedicáu a la ciudá recoyó más de mediu centenar de testimonios personales sobre los llugares, ambientes, feches y singularidaes de la capital, unviaos por persones non solo d’Uviéu, sinón de toa Asturies.

El conceyal de Participación Ciudadana, Mario Arias, estimó a los uvieinos “la bona acoyida que tuvo esta iniciativa, en coordinación cola conceyalía de Cultura y dientro del festival Parees. Dende esti gobiernu esperamos que festivales como ésti consolídense y que les obres d’arte que se vaigan a realizar sían del presto de toos uvieinos y de tolos que nos visiten”.

Con esa colección de testimonios, que formen parte del procesu participativu coordináu pol #colectivu Raposu Roxu, l’artista italianu Luogo Comune va componer una obra dedicada a Uviéu que recueya’l sentir de los sos vecinos y vecines. Va Ser unu de los cuatro murales de la quinta edición de Parees, impulsáu pola Fundación Municipal de Cultura y que se va celebrar del 13 al 19 de setiembre. “Con esti nueva edición del Festival Parees siguimos demostrando’l nuesu sofitu a les artes plástiques, nuna edición na que se consiguió implicar más a los ciudadanos que nunca”, destacó’l presidente de la Fundación Municipal de Cultura, el conceyal José Luis Costielles.

En cada edición, Parees, amás de dedicar les sos obres a temátiques asturianes y sociales, implica a la ciudadanía nos procesos participativos, nos qu’intervienen vecinos y vecines, asociaciones y espertos nes distintes temes de los murales. D’esa forma, la ciudá siente como propios los más de 25 murales que, hasta agora, camudaron la fisonomía del conceyu.

Nesta quinta edición, amás de Luogo Comune, participen otros trés artistes:
Emily Eldrige, estadounidense residente en Berlín, va realizar un mural dedicáu al Camín de Santiago.

Alba Fabre Sacrista?n, catalana, profesora d’Arte en Barcelona y muralista, va dedicar el so mural a les mazcaraes d’iviernu.

Foni Ardao, xixonés, sigue la llista d’artistes asturianos que #cada añu participen con una obra, nesti casu, dedicada a una tema lliteraria rellacionáu con Uviéu.

Convidada pola Fundación Municipal de Cultura, tamién va participar Encarna Díaz Velasco.

El festival, xuntu cola Fundación municipal de Cultura, va informar llueu de los allugamientos de cada mural y de la meyora de la so preparación, lo mesmo que de les posibles actividaes complementaries, que como l’añu pasáu van depender de la situación sanitaria.