Maxisteriu aprueba la Mención de Llingua por mayoría absoluta

31 marzu 07:39 2009 Imprimir

Alredor de mediu centenar de persones esperaben dende les cuatro la tarde a la puerta de la Escuela de Maxisteriu los resultaos de la votación, que se taba produciendo na Xunta d’Escuela. Una hora más tarde confirmábase la noticia que munchos yá esperaben: La Mención de Llingua Asturiana aprobábase sobrepasando la mayoría absoluta, con 58 votos a favor, 26 en contra y 3 en blanco.

L’allegría enllenó entós a los estudiantes que s’axuntaben a les puertes del centru pidiendo l’aprobación de la propuesta.

La directora de la Escuela, Gloria González Tellez falaba p’Asturnews a la fin de la Xunta y comentaba “tamos contentos de que s’aprobare lo que quería la mayoría”, sobremanera, comentó, “dempués del problema que supunxo que la propia propuesta nun s’aprobare nun entamu nel propiu Departamento de Filoloxía Española, con 13 votos en contra y unu a favor”.

Según espresó Tellez la propuesta aprobada güei “nun tien marcha atrás, anque tovía tien que pasar pelos correspondientes trámites burocráticos na propia Universidá y en Madrid”.

Unu de los alumnos participantes na Xunta d’Escuela comentaba p’Asturnews el desenrrollu de la mesma, onde dempués de que la directora lleere la propuesta del Departamentu y énte’l silenciu de tola asamblea, “el profesor Julián Pascual pidió que los miembros que presentaben la propuesta la comentaren”. Dos o trés intervenciones más, d’Esperanza Fernández, Jesús García y el director de Departamentu de Filoloxía, toes elles positives pa cola posibilidá de que l’asturianu tuviere una Mención, pesllaron una asamblea na que’l votu foi secretu.

Representantes d’organizaciones como la Xunta pola Defensa de la Llingua Asturiana o’l Conceyu Universitariu pol Asturianu amosaron yá la so allegría por esta decisión.

Con esta decisión los estudios d’asturianu qu’esisten anguaño na Universidá d’Uviéu queden inxeríos nel Sistema Européu d’Enseñu Universitariu, yá que l’añu pasáu la Xunta de Facultá de Filoloxía aprobaba tamién la enseñaza reglada del asturianu al traviés d’un Minor.

  Categories:
Loading Facebook Comments ...