Portada Cine Más de la metá de los actores nun trabayó ente 2014 y 2016

Más de la metá de los actores nun trabayó ente 2014 y 2016

by redacción asturnews
Foto: Mari Paz Molina (https://www.flickr.com/photos/123491884@N02/)

El 54 per cientu de los actores españoles nun trabayaron nengún día en dalguna actividá rellacionada col so oficiu ente 2014 y 2016, tal que reflexa la meyora del Estudiu sociolaboral del colectivu d’artistes y baillarinos n’España, ellaboráu pola Fundación AISGE y que se va presentar en septiembre.

Esti analís, realizáu a partir de 3.282 encuestes a artistes del sector, que representen el 39 per cientu del total n’España, revela que los actores que sí trabayaron sufrieron una amenorga nos sos ingresos: el 29 per cientu d’ellos percibieron menos de 600 euros añales, ente que los que nun pasen de 3.000 euros al añu son un 24 per cientu. Amás, solo un 4,9 per cientu de los integrantes del oficiu llogra unos ingresos cimeros a los 30.000 euros añales. AISGE señala que según estudios previos, en 2011, los actores que nun trabayaren mientres los trés últimos años yeren el 12 per cientu, una cifra bien similar al 14 per cientu de 2004, una cifra que nel periodu analizáu nesti estudiu multiplicóse por cuatro.

Ente los artistes que sí trabayen, amenórguense tantu los ingresos como los tiempos de trabayu. El 46 per cientu de los actores españoles nun llograron trabayar más de 30 díes a lo llargo del añu 2015, un porcentaxe que nel añu 2002 apenes superaba’l 30 per cientu. De la mesma, amóntase’l porcentaxe de trabayadores ensin contratu: un 12 per cientu nel momentu actual frente al 6,2 per cientu que los estudios de la Fundación AISGE contabilizaron allá por 2011.

Por ello, tal que destaca l’asociación, el 46 per cientu de los encuestaos compatibilicen la so actividá artística con otres ocupaciones llaborales. El 20 per cientu consiguen emplegos más o menos allegaos a l’actividá artística, como impartir cursos d’interpretación o danza, xeres de producción, terapies de técniques corporales, llocución, música o cantar, guion o dirección artística.

Esti informe sociolaboral, que va ser presentáu na so integridá a finales de setiembre na see madrilana de la Fundación AISGE, ye’l terceru de les sos característiques qu’ellabora esta entidá, encargada de xestionar los derechos de propiedá intelectual de los actores, baillarinos y directores d’escena españoles.

 

Tamién te podria gustar