Más de la metá de les 780 solicitúes pa una escuela infantil queden ensin plaza en Xixón

Más de la metá de les 780 solicitúes pa una escuela infantil queden ensin plaza en Xixón
20 mayu 15:40 2019 Imprimir

Nunca hasta anguaño asocediera que más de la metá de les 780 solicitúes pa una escuela infantil quedaren ensin plaza en Xixón no que paez aportar el problema a una situación que dificilmente tien igua.

Cada añu por estes feches, cuando’l Conceyu da a conocer les llistes provisionales d’almitíos nes escueles infantiles de 0 a 3 años constátase que la demanda ta bien penriba la ufierta. Pero nunca hasta anguaño asocediera que se queden fuera tantos neños como los que finalmente van ser almitíos. El próximu cursu van tener plaza n’una d’estes dolce escueles 372 pequeños, pero hai otros 408 pa los que les sos families van tener de buscar una alternativa.

Nun conceyu con una natalidá menguante -como asocede en tola rexón-, el fechu de que tantos neños queden ensin una plaza nuna escuela de 0 a 3 años atopa poques esplicaciones más allá de la necesidá de les families de recurrir a estos centros pa conciliar -tienen preferencia d’accesu los fíos de pareyes nes que los dos cónyuges trabayen- y l’evidente escasa ufierta de places. Porque les dolce escueles infantiles que funcionen en Xixón suman, en total, 880 places -casi tantes como les solicitúes presentaes anguaño-, anque obviamente non toes taben vacantes.

En Xixón, l’últimu centru de 0 a 3 años abriose hai casi seis años. Tamién dende 2013 lleva esperándose pola más que necesaria escuela infantil del centru de la ciudá, que se va allugar nel antiguu colexo Cabrales y va llevar el nome d’Eusebio Miranda. Sicasí, el proyectu sigue pindiu del vistu bonu del Principáu. Coles mesmes, la rede de centros infantiles de Xixón nun va ver aumentáu’l so tamañu hasta que concluyan les obres de la escuela de Contrueces, que ta agora en construcción. Allugada nuna cortil ente les cais Río Sella ya Irene Fernández Perera, va costar 1,6 millones d’euros, va tener seis unidaes y 78 places. Ta previstu qu’abra’l próximu cursu, anque non en septiembre, como’l restu d’escueles infantiles. Ello ye que cuando’l pasáu 22 d’abril abrió’l plazu d’inscripción pa estos centros, nin siquier ufiertáronse eses 78 places. Prevese que’l procesu p’axudicales llevese a cabu cuando les obres encarreren la recta final.

Como ye habitual, la demanda de places concentrase nos dos tramos de mayor edá. Esto ye, pa neños d’unu a dos y de dos a trés años. La escuela de Montevil -que, con 140 places en diez unidaes ye la de mayor tamañu de Xixón- ye la que mayor númberu de solicitúes rexistró pal próximu cursu: 101 solicitúes. Sígen-y les de Viesques, con 95 pidimientos, y Los Raitanes (en Juan Carlos I), con 94. Nel otru estremu tán los centros de 0 a 3 años de Tremañes, con 18 solicitúes y solu cuatro pequenos en llista d’espera, y de Vega-La Camocha, que recibió 21 pidimientos de plaza y solo dexó xuna n’espera.

Les families tienen agora de plazu hasta’l sábadu día 25 pa presentar allegamientos ya iguar aquellos posibles erros cometíos al presentar la documentación -en dellos casos falta la firma d’unu de el proxenitores. N’otros, datos fiscales o la acreditación de los ingresos d’unu de los padres-. Una vegada revisáu cada casu, les llistes provisionales podríen sufrir variaciones. Les definitives van conocese’l vienres 31 de mayu de 2019 y, como asocedió ayeri, podrán consultase nel tablón d’anuncios del Conceyu, na web de la Fundación Municipal de Cultura o directamente naquella escuela que s’escoyera como primer opción. Los menores que figuren na llista definitiva d’almitíos tendrán de formalizar la matrícula na mesma escuela del 3 al 7 de xunu.

El preciu máximu qu’han d’abonar les families por una plaza a xornada completa ye de 162 euros mensuales. Eso, si nun se beneficia de nengún tipu de bonificación nel preciu de la matrícula.

  Categories: