Portada Conceyos Más de 9.400 alumnos d’Avilés visitaron la Esposición Escolar sobro Pedro Menéndez

Más de 9.400 alumnos d’Avilés visitaron la Esposición Escolar sobro Pedro Menéndez

by redacción asturnews

Más de 9.400 alumnos y alumnes de centros educativos d’Avilés visitaron la Esposición Escolar sobro Pedro Menéndez en pasando por 20 centros públicos y alcordaos de primaria, secundaria y bachilleratu. D’equí p’arriba l’amuesa podrá vese n’otros centros escolares asturianos, el primeru d’ellos el Colexu La Inmaculada de Xixón.

Esti payares remató, nel Colexu Apolinar García Hevia, la Esposición Escolar sobro Pedro Menéndez con motivu del quintu centenariu de la so nacencia. Foi unu de los soportes colos que se quixo dar a conocer la so figura ente los más nuevos.

Inaugurada’l 11 de marzu nel IES La Madalena, dende entós fueron 20 centros escolares avilesinos de primaria, secundaria y bachilleratu, tanto de la rede pública como de l’alcordada, los que solicitaron la esposición conmemorativa de Pedro Menéndez d’Avilés. Llegó, a más de 9.400 alumnes y alumnos matriculaos nos centros educativos avilesinos, colo que foi xuna de les amueses itinerantes con mayor acoyida na comunidá educativa de la ciudá.

L’amuesa foi diseñada pol José Antonio Álvarez Castrillón, profesor de la Facultá de Formación del Profesoráu y Educación de la Universidá d’Uviéu y collaborador n’actividaes congresuales y espositives d’Avilés, como les xornaes dedicaes a los Fueros d’Avilés, Avilés na Edá Media, el Camín de Santiago, ente otres.

Consta de diez paneles nos que se recueye la vida del Adelantráu, el so contestu históricu, la realidá del otru llau del Atlánticu, les meyores técniques que desenvolvió y l’alcordanza que caltien n’Avilés como “llugar de memoria”. Tamién ta presente la ciudá hermana de San Agustín de la Florida.

Amás, a cada alumnu y alumna agasayóse-yos con un exemplar del cómic sobro la so figura, realizáu pola Cronista Oficial d’Avilés, María Josefa San Fuentes, y el profesor y dibujante Miguel Solís Santos.

D’equí p’arriba, la esposición va percorrer otros centros escolares asturianos. El primeru d’ellos va ser el Colexu La Inmaculada de Xixón, onde va permanecer hasta’l 16 d’avientu. Amás, aprovechando les vacaciones escolares, nes próximes navidaes va tar nel Centru Municipal de Persones Mayores de Les Meanes. Mientres el branu tuvo espuesta nos centros socioculturales de La Lluz, La Carriona y Los Canapés.

Tamién te podria gustar