Portada Plástiques Más de 8.600 persones visitaron la esposición “Avilés nel pasáu”

Más de 8.600 persones visitaron la esposición “Avilés nel pasáu”

by redacción asturnews

La exposición “Avilés nel pasáu”, una amuesa de fotografíes antigües de la villa avilesa, puede visitase hasta’l llunes 12 d’ochobre nel Muséu de la Hestoria Urbana d’Avilés.

La exposición ye una amuesa de fotografíes antigües pertenecientes al fondu de Nardo Villaboy y obra de distintos fotógrafos avilesinos, ente los que destaca José Espolita Coloráu. “Avilés nel pasáu” que dende’l 9 de xunu esibióse nel Muséu de la Hestoria Urbana d’Avilés, ta compuesta por una serie de fotografíes procedentes del arquivu de Nardo Villaboy, realizaes nel so mayor parte por José Espolita Coloráu, reflexen l’Avilés de la primer metá del pasáu sieglu; antes de la llegada de Ensidesa.

L’amuesa recibió más de 8.600 visites mientres los últimos cuatro meses. La notable arribación de visitantes, locales y turistes, mientres los meses de branu, favoreció ensin dulda l’espardimientu d’esta esposición qu’agora llega’l so fin. Son más de 50 imaxes en gran formatu d’espacios que munches vegaes agora resulten casi desconocíos. Paisaxe y paisanaje urbanu d’un Avilés formáu casi puramente por aquel núcleu históricu de la Villa y Sabugo.

Clausurada la esposición, va preparase una amuesa destinada al públicu escolar, como otres anteriores producciones del Muséu de la Hestoria Urbana d’Avilés, de cuenta que los alumnos y alumnes de los centros d’Avilés puedan conocer una parte de la hestoria más recién de la so ciudá. Esta previstu que s’ufierte a los centros educativos avilesinos pal segundu y tercer trimestres del cursu escolar, una vegada remate’l percorríu de la realizada en collaboración col Institutu d’Educación Secundaria Carreño Miranda sobre’l cuatrocientos aniversariu de la nacencia del pintor.

Tamién te podria gustar