Portada Cine Más de 13.000 estudiantes d’Uviéu van participar na programación de la SEMA

Más de 13.000 estudiantes d’Uviéu van participar na programación de la SEMA

by redacción asturnews

Más de 13.000 estudiantes d’Uviéu van participar na programación dela Selmana del Audiovisual Contemporaneu d’Uviéu, SACU, qu’estrena sección col nome de #laSEMA y va ufiertar cuatro programes diseñaos pol Festival de Clermont-Ferrand a alumnos de 45 colexos ya institutos.

Casi 3.000 alumnos van participar nes seis sesiones de Musicando cine, con Uviéu Filarmonía, destacando amás un taller Educa & Cine, destináu a neños de 8 a 12 años, que tien como oxetivu introducir a los más nuevos nel llinguaxe cinematográficu.

El conceyal de Cultura, Roberto Sánchez Ramos y el director de la Selmana del Audiovisual Contemporaneu d’Uviéu, Pablo de María, presentaron esta selmana pasada la programación más nueva d’esta cita cultural bautizada como ““laSEMA”.  En concretu van ufiertase cuatro programes de curtiumetraxes, el conciertu Musicando cine y un taller audiovisual a 13.163 estudiantes uvieinos. Del 6 al 28 de marzu, alumnos de 45 colexos ya institutos de la ciudá y el conceyu van pasar pol Teatru Filarmónica pa esfrutar de la sección didáctica diseñada por SACU pal so públicu infantil y xuvenil.

Según resaltó’l director de SACU, con  esta iniciativa “queremos educar a los futuros espectadores, semar en neños y adolescentes el gustu pol bon cine y ayudar na so formación”. Pa ello, SACU cunta cola ayuda de Clermont-Ferrand, el más importante festival de curtios del circuitu internacional.  El certame diseñó una sección estremada en cuatro programes d’edaes: 3-5, 5-8, 8-12 y 12-16.  Sánchez Ramos resaltó que munchos neños y neñes afayen el cine con esta iniciativa, “ye estelante ver cómo viven esta primer esperiencia que los marca” yá que según tresmitiéron-y los docentes de los centros participantes, munchos de los alumnos “desenvuelven nel colexu trabayos de calter audiovisual dempués d’asistir a laSEMA”.

Esta sección va ufiertar 20 títulos que participaron en numberosos festivales internacionales. Tratase de novedoses propuestes narratives y estétiques que trunfaron en certames como Cannes, Annency, Sitges, Málaga y Clermont-Ferrand, ente otros, y con premios Oscar (Logorama) o nominaciones a la dorada estauína (Boogaloo & Graham).

Debíu al gran interés de los colexos, laSEMA va empezar unos díes primero que SACU. Los cuatro programes van desenvolver nel Teatru Filarmónica dende’l 6 hasta’l 28 de marzu, en  28 sesiones (cuatro más que na edición de 2018).

La Conceyalía d’Educación del Conceyu d’Uviéu collaboró con SACU na organización de les visites de los alumnos. Ye’l cuartu añu que’l certame entama xuna sección pa neños y adolescentes. L’añu pasáu pasaron pol Filarmónica más de 8.000 alumnos y alumnes de 43 colexos ya institutos y, nesta edición, laSEMA va acoyer a más de 13.000 estudiantes de 45 centros de la ciudá y del conceyu.

¿Qué títulos van ver los pequeños? Pryg-Skok, de Leonid Shmelkov; L’home de bolsu d’Ana Chubinidze; La Petite pousse, de Chaïtane Conversat; Dos tranvíes, de Svetlana Andrianova y El pequeñu pirata, del grupu formáu por Hippolyte Cupillard, Ornella Macchia, Bruno Tondeur, Gwendoline Gamboa y Margot Reumont.

El programa pa los alumnos de 5 a 8 años ye’l siguiente: L’home páxaru, de Quentin Marcault; Dos globos, de Mark Smith; Plody mrak?, de Kate?ina Karhánková; Llión, de Julia Ocker y Gunther, de Erick Oh.

Pa los neños de 8 a 12 años preparóse estos títulos: La gran hestoria d’una pequena raya, de Antoine Robert; Balancín, de Yookyung Cha; Viaxeru del tiempu, de Steve Kenny; El lleón y el monu, de Benoit Feroumont y La India galantiadora, de Clément Cogitore, y Xuna furtiva llárima, de Carlo Vogele.

El programa va completase pa los adolescentes con Una furtiva llárima, de Carlo Vogele; Boogaloo & Graham, de Michael Lennox; Logorama, de Ludovic Houplain, Hervé de Crécy y François Alaux; La muerte, padre y fíu, de Vincent Paronnaud y Denis Walgenw;  La India galantiadora, de Clément Cogitoreel y Híbridos, del equipu formáu por Romain Thirion, Florian Brauch , Matthieu Pujol , Kim Tailhades , Yohan Thireau y Florian Brauch.

Una de les novedaes de laSema en 2019 ye’l taller Educa & Cine destináu a neños de 8 a 12 años. El so oxetivu ye introducir a los más nuevos nel llinguaxe cinematográficu, amás d’enseña-yos a trabayar cola técnica d’animación stop motion y la parada por sustitución, y el procesu d’escritura d’un guion y realización de storyboards. L’oxetivu final va ser la grabación de dos curtiumetraxes, que podrán vese nel intre de SACU.

El taller va ser impartíu por Educa & Cine – Espaciu d’atención educativa y desenvolvimientu de la creatividá. Va Tener una duración de 14 hores y va desenvolvese del 8 al 10 de marzu. Namá hai 12 places pa esti taller. Los interesaos tendrán d’inscribise nel corréu info@semanasaco.net a partir del próximu 4 de marzu.

Tamién te podria gustar