Más d’85 instituciones van participar nel X Foru Empléu de la Universidá d’Uviéu

05 abril 07:39 2011 Imprimir

Estudiantes de los últimos cursos y acabante titular de la Universidá d’Uviéu tienen una cita destacada la selmana próxima en Xixón, la que puede convertise na so primer oportunidá llaboral. Trátase del X Foru Empléu de la Universidá d’Uviéu, entamáu pola institución académica y la Fundación Universidá d’Uviéu, que va tener llugar nel Pabellón Central del Recintu Ferial “Luis Adaro” de Xixón, los díes 5 y 6 d’abril.

El Rector de la Universidá d’Uviéu, Vicente Gotor, presentó esta nueva edición del Foru que va cuntar cola participación de 86 instituciones. Más de 75 empreses van tener presencia física con un stand nel recinto y el restu collaboren en distinta midida col desenvolvimientu de la presente edición. El rector animó a los mozos a participar nesti Foru que sirve como puntu d’alcuentru ente estudiantes, titulaos y empreses. Vicente Gotor recordó que la empleabilidá y la cultura entamadora son dos exes fundamentales dientro del Campus d’Escelencia de la Universidá d’Uviéu.

Participaron tamién na presentación d’esta décima edición, el director de la Obra Social y Cultural de Caxastur, José Vega, y el representante de la Comisión Executiva de FENA, Laureano Cavia, amás de la Vicerrectora d’Estudiantes y Empléu, Susana López Llabres.

La inauguración va cuntar cola participación de Pilar Jericó, Doctora n’Organización d’Empreses y esperta en llideralgu, encargada de la conferencia d’apertura que va llevar el títulu “Atrévite a ser protagonista del to propiu futuru”. van celebrase tamién cerca de 20 presentaciones d’empreses participantes, y trés meses redondes: una d’elles sobre discapacidá y empléu y otros dos venceyaes a los Clusters de Biomedicina y Salú y Enerxía, Medioambiente y Cambéu Climáticu del Campus d’Escelencia Internacional, según el VII Alcuentru de Directivos, entamáu por FENA, que va analizar “Los desafíos de la nueva economía” y va cuntar col ex ministru Jordi Sevilla na conferencia inaugural. Como ye habitual, l’autoempléu y la creación d’empreses van tener el so espaciu nel foru, con presencia de les entidaes de sofitu a estes iniciatives.

El Foru Emplego ye una iniciativa que se vien celebrando dende l’añu 2002 y que’l pasáu añu axuntó a más de 6.000 participantes.

  Categories:
Loading Facebook Comments ...