Marta Capín reconstrúi la masacre de Valdediós nuna novela

En ochobre de 1937 soldaos de les Brigades Navarres qu’avanzaben dende l’oriente d’Asturies pa bastiar les últimes posiciones del frente republicanu fusilaron a un grupu de trabayadores del Hospital Psiquiátricu d’Uviéu, treslladáu mientres la guerra, al llugar del monesteriu de Valdediós. Esa ye la base sobre la que constrúi Marta Capín la so novela “El Valle de Dios”, una crónica d’aquellos fechos remanecida de la información que l’autora foi recopilando al través de los datos obteníos na investigación de la fosa común onde foron enterraes les víctimes y que narra la hestoria al través d’una d’elles, l’enfermeru Antonio Piedrafita.La novela preséntase esti miércoles 6 nel Fnac de Sieru.

El fusilamientu de personal civil del Hospital Psiquiátricu d’Uviéu nel so allugamientu mientres la guerra civil en Valdediós sufrió a lo llargo d’abondos años la ocultación y l’olvidu. Hasta la escavación de la fosa común onde foron enterraes les víctimes en xunetu de 2003 corrieron sobre estos fechos toa clase de lliendes y versiones. La escavación del enterramientu y la investigación de datos documentales referíos al sucesu ufierten güei información bastante pa saber qué pasó ellí y quienes foron los protagonistes d’esta traxedia. Marta Capín, miembro de l’asociación ‘Asturias por la memoria’, quiso relatar esa hestoria escaecida y agora recuperada en “El Valle de Dios”, una novela na que tolos fechos narraos básense no sucedío na realidá.

Capín declaró a Asturnews que la so esperiencia nel procesu d’investigación de la fuesa común de Valdediós ta nel orixen fundamental d’esti llibru col que “quier dexar constancia escrita, amás de la que ya esiste agora nos datos consiguíos pola escavación, d’unos fechos que sucedieron y nun pueden permanecer nel olvidu”. L’autora de “El Valle de Dios” afirma que “podía haber narrao la hestoria de caún y caúna de les once muyeres y seis homes enterraos na fuesa, dalgo materialmente difícil, de manera que centreme na hestoria d’una de les víctimes, l’enfermeru Antonio Piedrafita

pa reconstruir una hestoria que foi la de toos esos homes y muyeres”. Na presentación de la novela va acompañar a Marta Capín un fíu del enfermeru protagonista del so relatu y del qu’apaecieron los restos na fuesa común, xunta los del restu de víctimes identificaes.

Alrodiu de les distintes versiones que circularon sobre estos sucesos l’autora de “El Valle de Dios”, afirma que “colos datos de los que disponemos al través de los resultaos de los estudios forenses, documentales y testimoniales, güei podemos saber lo que realmente pasó”. Capín remembra qu’al empiezu de la investigación de “Asturias por la memoria” vecinos de la zona aseguraben a los investigadores que la masacre de Valdediós yera “una llienda”, tamién circuló una versión escabrosa de los fechos según la cuala delles de les muyeres asesinaes pudieran haber sufrío agresiones sexuales o tortures enantes del fusilamientu, colos datos que güei se conocen, afirma Marta Capín que “nun se correspuende cola realidá de lo sucedío, nin foi una llienda nin ocurrieron esos otros supuestos fechos, foi un fusilamientu y l’asesinatu fríu d’unes persones”. L’autora de la novela recuerda qu’apocayá de salir en prensa un de los reportaxes sobre la escavación de la fuesa una de les persones que participaron nel fusilamientu púnxose en contactu cola so asociación y col fíu del enfermeru Antonio Piedrafita pa relatar cómo se produxo la execución de los trabayadores sanitarios. Otru testigu, malpenes un nenu n’ochobre de 1937, vecín del llugar corroboró la versión del antigu militar.

Marta Capín amuésase satisfecha de que llograran averiguar lo sucedío y poder idenficar los diecisiete cuerpos enterraos na fuesa de Valdediós “inda esti ye un llabor mui poco satisfactoriu, frustrante poles enormes dificultaes qu’entraña y les numberoses trabes coles que se topa cualquier que quiera investigar sobre la guerra civil y la represión posterior”. Los intentos de recuperar la memoria hestórica entamaos nos últimos tiempos son vistos por l’autora de la novela como “dalgo esperanzadores, pero inda se percibe una gran rocea a remover esi pasáu, tovía significa muncho en determinaos sectores y pa bien de persones con significación pública que prefieren qu’esto siga tapecío porque los toca mui de cerca”. Noveles como la suya o los trabayos d’investigación de foses comunes, pueden contribuir “a que les xeneraciones desconocedores de lo sucedío na guerra civil y sobre too na postguerra puedan tener información de dalgo que sucedió nun hai tanto equí”. Respective a les cifres aprosimaes de víctimes de la represión n’Asturies, Marta Capín nun s’atreve a conseñar un númberu: “tenemos cálculos aprosimaos, pero diben ser siempre insuficientes porque desconocemos el númberu y l’allugamientu de bien de fueses comunes y el total de les víctimes, munches non rexistraes nin reclamaes polos sos familiares, pero n’Asturies hai foses nes qu’hai cientos d’enterraos, como la del cementeriu d’Uviéu, onde hai alrodiu de mil cuerpos, por eso ye arriesgao falar de cifres, siempre díbamos quedar curtios”.