Portada Música Marisa Valle Roso presenta so discu más personal, “Lo fugaz”

Marisa Valle Roso presenta so discu más personal, “Lo fugaz”

by asturnet

Marisa Valle Roso presentó’l so nuevu discu, “Lo fugaz”, que se va asoleyar íntegramente’l próximu 14 de xineru. El vienres, 19 de payares, la cantante llanzó nes plataformes musicales ún de los temes incluyíos nel discu, “Títere o esclava” col qu’amuesa l’enfotu la so propuesta musical.

El cantar”Títere o esclava” ye la so primer composición, data d’hai un par d’años ya interpretólu per primer vegada nun actu contra la violencia machista n’Uviéu. Valle Roso va presentar “Lo fugaz” en conciertu’l 15 de xineru de 2022 nel teatru de la Llaboral, en Xixón, y a partir d’ende va entamar una xira nacional. Tol discu, del que yá asoleyó los singles “Cantemos” y “Desvirtuarte”, ta compuestu y escritu dafechu pola mesma artista.

L’artista presentó “Lo fugaz” ente flores, na floristería “Materia Botánica” d’Uviéu. Ellí comentó’l so trabayu ya interpretó dalgunos de los sos nuevos cantares, acompañándose de la guitarra. “Lo fugaz”, contó, ye’l títulu d’un poema de Ricardo Jaimes Freyre, que fala de como “una rosa con lo frágil y fugaz que es su vida, al desintegrarse por una ráfaga de viento y caer sus pétalos sobre el oscuro lodo, consigue que su esencia, su olor, perdure en el tiempo”. “Les roses provoquen emociones nos demás y nós tenemos munches formes de facelo, una amuesa de cariñu, un actu d’arrogancia, llevantando la voz polo que ye inxusto o utilizando les ferramientes que tenemos pa xiringar les conciencies, facer sentir o cavilgar”, según Valle Roso.

Cada cantar del so proyectu pretende ser “una d’eses roses que define Freyre, enllena de vida y cola so propia imaxe, que pretende llegar y emocionar al que la ve y la siente per distintos medios artísticos”.

El discu ta producíu por Charlie Bautista (Christina Rosenvinge, Tulsa, Coque Malla), los amiestos son d’Iván González “Chapo” (MClan, Amaral, Deluxe). La grabación fíxose n’Estudio Uno y en El Lado Izquierdo Estudios. El director d’arte de “Lo fugaz” ye Bernardo Baragaño, con estilismos de la famosa diseñadora Celia B.

Tamién te podria gustar