Portada Escéniques Margen estrena la so versión de la ‘Xulia’ de Strindberg, ambientada na Asturies rural

Margen estrena la so versión de la ‘Xulia’ de Strindberg, ambientada na Asturies rural

by asturnet

De Suecia a l’Asturies rural de primeros del sieglu XX, col so entornu social y el so idioma propiu. La compañía Margen estrena nel teatru Palacio Valdés d’Avilés la so versión de ‘Xulia’, obra del autor suecu August Strindberg, nun apueste pola rellectura de montaxes clásicos en llingua asturiana cuyu biltu remóntase al añu 2002.

La escenificación que Margen estrenará énte’l públicu a les 20,15 hores d’esta nueche ta dirixida por Arturo Castro, interpretada por Ángeles Arenas, José Antonio Lobato y Verónica Gutiérrez ya incorpora una dramaturxa de los propios Castro y Lobato sobro la base del espectáculu orixinal, difundíu antes n’España baxo’l títulu ‘La señorita Julia’.

Los componentes de Margen presenten la so nueva incursión nel teatru en llingua asturiana como una amuesa de que l’idioma emplegáu nes artes escéniques nun dexa de ser una parte del espectáculu, que nesti casu tará más prósimu al públicu asturianu con rellación a obres qu’empleguen otres llingües.

Siguiendo una adaptación fecha pol filólogu y escritor Pablo Tejón y depués de poner en marcha, por encargu de l’Academia de la LLingua, la versión de la obra con ocasión del Día de les Lletres Asturianes del añu 2002, los integrantes de la compañía Margen aseguren que la hestoria narrada en ‘Xulia’ ye un amiestu de sentimientos universales, ente ellos el gociu y el sufrimientu.

Tamién te podria gustar