Manifestación en defensa de la presencia del asturianu na educación primaria

12 febreru 00:21 2007 Imprimir

La Xunta pola Defensa de la Llingua Asturiana y los sindicatos CCOO, FETE-UXT y SUATEA convoquen una Manifestación en Defensa de la enseñanza del asturianu en primaria. La manifestación va entamar el prósimu sábadu 17 de febreru a les 13.00 dende la Estación del Norte d’Uviéu. La movilización tien por finxu l’algamar una redacción del curriculu de primaria nel que se garantice la presencia digna y normal de la llingua asturiana en toles escueles del país.

Les organizaciones convocantes de la manifestación del prósimu sábadu 17 de febreru consideren qu’el derechu al accesu al estudiu y conocimientu de la llingua asturiana ta reconocíu pola llexislación y “ha ser garantizáu ensin escepción”. Poro consideren que l’asignatura d’asturianu tien de ser d’ufierta obligatoria en tolos centros d’educación primaria, pa tolos escolinos y escolines. Les organizaciones convocantes esixen la eliminación de les ratios mínimes, qu’actualmente establez la Conseyería d’Educación pa poner l’asignatura d’asturiana, como forma de garantizar l’accesu al ensiñu de la llingua asturiana nel sistema educativu asturianu.
Los sindicatos y la organización de defensa de los derechos llingüísticos consideren que la propuesta de la Conseyería d’Educación chocaría contra la Llei d’Usu, na que se recueye que “La escoyeta del estudiu o del emplegu del asturianu como asignatura del currículu en nengún casu podrá sirvir de motivu de discriminación de los alumnos. Pa los que lo escueyan, el so aprendimientu o usu nun podrá torgar que reciban la mesma formación que’l restu del alumnáu”.

Dende les organizaciones convocantes esixese que’l nuevu currículu, que va ser aprobáu’l 23 de febreru, abra la posibilidá de que la llingua astruiana sea emplegada como llingua vehicular na enseñanza d’0otres materies.

Dende la Xunta pola Defensa de la Llingua Asturiana denúnciase qu’esti nuevu conflictu alcuéntrase na situación de “marxinalidá” llegal de la llingua asturiana al nun tar reconocida como llingua oficial. Esti fechu considérase dende la organización de defensa de los derechos llingüísticos como la causa de que n’Asturies se vengan aplicando “les llectures más restrictives de los derechos llingüísticos y educativos”.

El borrador del Decretu que regula la Primaria conderga al asturianu

  Categories:
Loading Facebook Comments ...