Mañana entamen los actos de la XXVIII Selmana de les Lletres Asturianes, dedicada a la narrativa

Redacción.

La XXVIII Selmana de les Lletres Asturianes entama mañana martes a les seis de la tarde cola representación de la obra ‘De boca a oreya’, pola Compañía Nun tris na biblioteca ‘Escueles Dorado’ de Sama, nel conceyu de Llangreu. Anque la presentación oficial nun va ser hasta esti vienres a les doce la mañana nel patiu de la Conseyería de Cultura, Comunicación Social y Turismu.

Como vien siendo habitual nos últimos años, la selmana de les lletres ta dedicada a un xeneru lliterariu. Si en 2005 fuera a la poesía y en 2006 al teatru, esti añu la Selmana va dedicase al xeneru narrativu. El títulu de la XXVIII Selmana de les Lletres Asturianes ye ‘Ello yera una vez… un tiempu de narraciones’.

Na celebración de la Selmana van tener especial protagonismu los actos d’ociu y la presentación de publicaciones, tanto les oficiales de la Selmana como otres revistes y llibros que van presentase dientro de los actos. Amás, el vienres 4 de mayu, l’Academia de la Llingua celebra’l Día de les Lletres Asturianes con una xunta pública nel Teatru Campoamor.

Programa de mañana:

● 18:00 hores │ Biblioteca “Escueles Dorado” (Sama, Llangreu)
Representación de la obra De boca oreya. Compañía “Nun Tris”.