Maïa Vidal, Animic y Xarim Aresté abren el festival Twinpalm

Maïa Vidal, Animic, Xarim Aresté, The Suicide of Western Culture y Albert Jordà van actuar el 18 de febreru na sesta edición del festival Twinpalm, la versión iverniza del  Palmfest, sigún informa la organización del festival.

Encabeza’l cartelu la francu-americana Maïa Vidal y la so eclecto-pop con bases electróniques, ente qu’Animic van presentar el so sestu trabayu, Skin, que va ver la lluz el próximu 1 de febreru. Coles mesmes, el festival va cuntar con Xarim Aresté, natural de Flix (Tarragona), anque afincáu en Barcelona dende va tiempu, que va interpretar los cantares de La Rosada cola so banda.

Completen la programación dos propuestes diametralmente opuestes: l’hipnóticu show audiovisual basáu n’electrónica de baxa fidelidá de los barceloneses The Suicide of Western Culture y el pop d’autor del tarraconense Albert Jordà, que tamién va presentar en Twinpalm el so nuevu discu, Punt i a part.

Estes actuaciones van tener llugar mientres la tarde del sábadu 18 de febreru nel Auditoriu del Centre Cultural Infant Pere de l’Hospitalet de l’Infant, de pocu más de 350 places, y les sos entraes pueden adquirise por solo 14 euros n’ufierta de llanzamientu hasta’l próximu 18 de xineru.

Twinpalm ye una iniciativa d’AMA (Associació Multicultural Alternativa), la entidá promotora del festival Palmfest, que mientres diez año foi’l gran referente de la música independiente na Mariña Dorada y el sur de Catalunya.