Madrid ultima una llista de proyectos culturales desestimaos pa que los conceyos vuelvan a solicitalos

Si nun hai conveniu nin presupuestu, nun hai obra. El Gobiernu central unviará darréu al Principáu una llista de grandes proyectos culturales comprometíos baxo l’anterior Executivu del PP y qu’agora habrán tramitar otra vuelta ‘dende cero’ los ayuntamientos afectaos, acordies colos criterios aprobaos esta mañana p’aplicar el denomináu 1 por cientu cultural, obligación de cada ministeriu de reservar esi porcentaxe p’acciones culturales nes inversiones propies de más de 100 millones de les vieyes pesetes.

Les prioridaes pa executar los proyectos pendientes sedrán les mismes que reclamó hai díes el Parlamentu asturianu, y qu’afitara el Conseyu de Patrimoniu Hestóricu n’ochobre pasáu: que se cumpla’l fin previstu pa esi tipu d’actuaciones con financiación ministerial, que s’actúe sobro edificios o elementos catalogaos como Bienes d’Interés Cultural, que’l proyectu tea sufragáu por varies Alministraciones y que se trate d’obres públiques.

Asina lo decidió güei en Madrid la Conferencia Sectorial de Cultura, na que participó la conseyera asturiana del ramu, la socialista Ana Rosa Migoya, quien precisó que’l so departamentu contactará colos ayuntamientos afectaos por proyectos agora desestimaos pa que los tramiten otra vuelta, si-yos peta.

“Na anterior llexislatura aprobáronse proyectos ensin la firma de los oportunos convenios y ensin consignaciones presupuestaries”, recordó Migoya, y esi fechu xeneró una situación “qu’esmolez a los gobiernos autonómicos y que fai falta esclariar”.

En principiu, sólo siete de los 17 proyectos comprometíos pol PP p’Asturies siguen en pie: los remocicamientos de les cubiertes de la Catedral, el claustru’l monasteriu de San Pelayu, la Torre’l Reló de Castropol y el monasteriu de Corniana; la preservación del cascu hestóricu de Llastres; les obres na Casa Hevia, en Villaviciosa; y la fechura’l proyectu de recuperación del entornu de la ilesia de Santuyano, n’Uviéu.

Archivu. El Parlamentu pide-y a Madrid que respete les sos prioridaes nos proyectos del 1 por cientu cultural