Luis Núñez y los Folganzanes echen un culín de primavera en Lorient

08 agostu 19:04 2018 Imprimir

Luis Núñez y los Folganzanes estrenáronse en Lorient cola presentación del so discu y el recbimientu gayoleru de los sos temes más populares, como Echa un culín, ente’l públicu del Palaciu de Congresos, más veteranu que’l que van tener esti xueves nel Quai de La Bretagne.

Nun foi denguna sorpresa pal públicu asturianu, pero sí pal lorientés que diba a un conciertu que camentaba sedría más tradicional. Pero atopose con esa amestadura simpática y bien executada del pop de los 80 y la música asturiana con raigañu que tan bién tan amestando nesta propuesta bien amañosa de músicos de la calidá y el nomatu de Luis Núñez o Marcos Díaz, del llau pop, y Dani García de la Fuente, del llau folk, xunto a mozos como Fabián a la gaita, Armando a los teclaos y Arturo a la batería.

Xuro nun tornar amosó a ratos la propuesta, ya afitada, del grupu d’amestar les remeiniscencies de sones que fain alcordanza de La Frontera o Los Secretos, con un folk mozu y frescu. Una propuesta que se desenvuelve perbien nel escenariu y que nun necesita siquier de l’animación que Dani de la Fuente pidió al públicu de Lorient pa que tatarearan l’estribillu d’esa versión de la tradicional Chalaneru, que s’amuesa afayadiza p’abordala dende cualquier estilu o propuesta.

L’actuación definitiva sedrá la d’esti xueves nueche nel Espace Bretagne, onde’l públicu ye más mozu y los asientos de terciopelu, que tamién sirvíen nos primeros 80 pa esfrutar de conciertos de pop na España de la Transición, van camudar nun escenariu abiertu, preparáu pa danzar y pa vivir meyor el direutu.

El grupu, esponente del folk-rock alternativu n’Asturies, ta lideráu por Luis Núñez (guitarra, mandolina y voz) ya integráu por Dani García (arpa, violín y voz), Fabián Fernández (gaita y flautes), Arturo Ávila (batería y voz), Marcos Díaz (baxu y voz) y Armando Fernández (teclaos).

El propiu grupu diz que’l conxuntu de cantares almite dos escuches bien estremaes: “Una que nun riquier conocencies musicales, na que tres una primer audición, resulta difícil nun mover el cuerpu y afayase cantando los estribillos, y otra más fonda y pausada, onde unu puede apreciar la fondura de los cantares, la intención de los testos y la calidá de la música, con una llínea clara, onde tou tien relación con tou, al marxe de la variedá temática”.

Recibió numberosos premios a lo llargo de la so carrera ente ellos, en 2017, el Tinu Casal y el Premiu al Meyor Cantar n’Asturianu.

  Article "tagged" as:
  Categories:
Loading Facebook Comments ...