Lucía Bernardo imparte esti sábadu’l doble taller de danza “El to cuerpu / La to casa” n’Avilés

Lucía Bernardo imparte esti sábadu’l doble taller de danza “El to cuerpu / La to casa” n’Avilés
28 xunu 20:11 2019 Imprimir

Na Factoría Cultural, con inscripción gratuita, Lucía Bernardo imparte esti sábadu’l doble taller de danza “El to cuerpu / La to casa” n’Avilés.

La coreógrafa, directora d’escena y pedagoga Lucía Bernardo, beneficiaria d’una de les ayudes a la creación artística 2018-2019 concedíes pola Fundación Municipal de Cultura, va impartir esti sábadu 29 de xunu na Factoría Cultural el taller gratuitu “El to cuerpu/La to casa” sobro la pieza escénica La sorprendente hestoria d’un cuerpu desplegable y el so procesu creativu.

Tratase de la obra que Lucía Bernardo firma al pie de Cristina Henríquez, siendo una coproducción ente la Compañía SOMOSDANZA y los Teatros de la Canal de Madrid, onde tuvo llugar el so estrenu’l pasáu mes d’abril, col sofitu de la Factoría Cultural avilesina.

Siguiendo como estructura’l llibretu de la obra y de forma amena y risondera, Lucía Bernardo va averar a los y les participantes l’universu poéticu que-y sirvió d’inspiración mientres el procesu de creación d’esta pieza escénica. Articulando conceutos teóricos y prácticos sobro’l cuerpu, la danza, el xuegu, l’humor, la fantasía y les ciencies naturales, Lucía Bernardo va amosar los factores que componen esta obra y la so riqueza artística. El taller va cuntar con arquivos visuales de la obra estrenada en Madrid.

Va estremar en dos sesiones, dependiendo del públicu al que vaiga empobináu. La primera d’elles, con un máximu de 20 places, va tener llugar de 10 a 12 hores, abiertu al públicu polo xeneral a partir de 6 años. Pela so parte, el segundu taller va escurrir ente les 12:30 y les 14:30 hores, dirixíu a estudiantes de danza ya interpretación y profesionales d’estes disciplines. Va Cuntar tamién con un máximu de 20 places.

En dambos casos la inscripción ye totalmente gratuita y l’únicu requisitu común ye’l d’allegar con ropa cómodo. P’acutar places ye. Les matrícules pueden realizase de manera presencial n’el mesmu centru de 9 a 15 y de 16:30 a 21 hores, o bien telefónicamente nos teléfonos 985 548 617 y 985 129 375, indicando nome y apellíos, teléfonu de contactu y fecha de nacencia.

Más información

  Categories: