Los Yerbatos presenten l’espectáculu “Bimenes en Danza”

by asturnet | octubre 3, 2012 8:32 am

[1]

El sábadu 13 d’ochobre, el polideportivu del Colexu Públicu Martimporra (Bimenes) va acoyer l’espectáculu de canción, baille y música tradicional“Bimenes en danza”, entamáu pola Asociación Folklórica y Cultural Los Yerbatos en collaboración cola Asociación Cultural El Corriellu La Pandorga, el Conceyu Bimenes y la Mancomunidá Comarca de la Sidra. L’espectáculu arranca a les 18’00 hores cola actuación de la cantante Anabel Santiago y de les escolines de canción asturiana de la Escuela de Música Tradicional Los Yerbatos.

Darréu, a les 18’30 hores, actuarán los grupos de baille “Los Yerbatos” y “Sarau Alcudienc”, que vien dende la islla de Mallorca dientro d’un intercambiu col grupu de Bimenes. Y, de magar les 20’30 hores, pondrán-y el ramu al espectáculu los músicos Ramsés Iglesias y Xosé Antón Fernández “Ambás”. “Bimenes en danza” conviértese, d’esta manera, nuna de les cites imprescindibles de la música tradicional asturiana pa esta seronda de 2012.

Endnotes:
  1. [Image]: http://asturnews.com/bancofotos/fotos/2/6012.jpg

Source URL: http://asturnews.com/los-yerbatos-presenten-l%c2%92espectaculu-%c2%93bimenes-en-danza%c2%94/