Los trabayadores de los servicios de normalización denuncien el parón de la rede municipal

26 marzu 23:19 2006 Imprimir

L’Asociación de Trabayadores de la Normalización Llingüística (ATNL)denuncia nun comunicáu el parón sufríu poles oficines municipales de promoción del asturiano y alerta que de los diez servicios creaos en conceyos anguaño namás funcionen seis. El colectivu apunta a los ayuntamientos d’Avilés, Mieres, Llangréu y San Martín xunto a la Conseyería de Cultura como responsables de la situación.

El comunicáu d’ATNL señala que de les diez Oficines qu’esistíen fináu l’añu 2005 namás hai seis n’activo quedando cuatro conceyos ensin serviciu de normalización, polo qu’esti colectivu califica de “dexadez lo mesmo de los responsables políticos de los Conceyos que de la Conseyería de Cultura”. La situación, según los trabayadores de los servicios, “agrávase entá más cuando nestos conceyos nun se contó col asesoramientu de los técnicos pa planificar la política llingüística, acabándose’l plazu de les subvenciones pa la normalización del asturianu nos conceyos que na mayoría de los casos ye la única fonte de financiación pa facer política llingüística”, afirmen.

El colectivu que xunta al personal de les oficines normalizadores apunta a los ayuntamientos de los conceyos onde los servicios tán paralizaos como responsables y acúsalos de falta de rigor ya que, según afirmen “paeznos un actu d’irresponsabilidá’l que dende los Conceyos nun sepan o nun quieran saber en qué consiste’l procesu de normalización llingüística, un llabor que necesita d’años de planificación y de compromisu claru pa cola llingua asturiana”. La Conseyería de Cultura ye la otra parte con responsabilidá nel asuntu a xuiciu de l’ATNL por nun facer un siguimientu del llabor desenvueltu por esos servicios y polos ayuntamientos de los que dependen. L’asociación entiende nesi sen que “la solución qu’ufre la Conseyería de Cultura p’afitar estes Oficines y pa reforzar la Rede de normalización nos conceyos ye ineficaz dafechu” y píden-y a la conseyera de Cultura, Ana Rosa Migoya, “que tome en serio la normalización del asturianu y los derechos lingüísticos de los asturianos buscando una solución efectiva qu’igue los problemes que tán surdiendo nos Conceyos”.

Otra de les deficiencies atopaes pola ATNL nel funcionamientu de los servicios municipales son los procesos de selección del personal, que pa esta asociación “nun cumplen unos requisitos mínimos y serios”. El colectivu ya fexo pública la so inquietú en xineru, cuando se constituyó y advirtió de la situación de la Rede.

  Categories:
Loading Facebook Comments ...