Los trabayadores de la normalización nun participen nos alderiques de la Comisión d’Estudiu de la Xunta

Los trabayadores de la normalización nun participen nos alderiques de la Comisión d’Estudiu de la Xunta
17 xunu 12:40 2016 Imprimir

Hoi anuncióse la llista d’intervinientes de la Comisión Especial d’Estudiu sobre’l Réxime de Protección y Promoción del Asturianu convocada pol Parlamentu Asturianu. y los trabayadores de la normalización llingüística amuesen la so esmolición poal ausencia d’especialistes del so coleutivu ente los llamaos a declarar nesa comisión.

“Ye sintomático y frustante pal colectivu de trabayadores de la normalización llingüística ver, cómo otra vuelta más, la política asturiana sigue ensin dar importancia al trabayu que se bien desenvolviendo nos Servicios de Normalización Llingüística de toa Asturies dende hai más de 15 años”. Con estes palabres, los trabayadores de los servicios de Normalización quieren dexar claro que nun son a entender “cómo, de 38 comparecientes, onde hai 10 representantes de la Universidá d’Uviéu, 5 representantes de la música asturiana, 6 responsables d’empreses asturianes y una montonera profesionales del ámbitu asturianu, nun hai nengún representante del únicu colectivu de trabayadores profesionalizáu na normalización social del asturianu n’esclusiva como somos los representantes de los Servicios de Normalización Llingüística”.

Nuna Comisión como esta “na que nun se va poder tratar nin afondar nos problemes reales de la normalización social de la llingua asturiana y eonaviega”, paez-yos a los trabayadores del coleutivu que “ye un error y ye nun querer ver ún de los caminos más claros onde facer política llingüística que realmente sirva pa falar d’un procesu de recuperación de los idiomes d’Asturies”.

Como siempre “les y los trabayadores de la normalización llingüística tamos siempre a disposición de los partíos políticos p’avanzar y collaborar nun modelu de política llingüística que de verdá, sirva pa recuperar la llingua asturiana y eonaviega. El facenos invisibles nun fai otru que danos más gana de trabayar nel ámbitu que tien la mayor cercanía cola xente como ye’l de los Conceyos”.

  Categories:
Loading Facebook Comments ...