Portada Conceyos Los Talleres Infantiles d’Avilés (TIA) entamaron nel CEIP El Quirinal

Los Talleres Infantiles d’Avilés (TIA) entamaron nel CEIP El Quirinal

by redacción asturnews

Esti llunes 29 de xunu entamó una nueva edición de los Talleres Infantiles d’Avilés (TIA) del branu nel CEIP El Quirinal con un total de 39 neños y neñes participandon na primer vez selmanal, que s’empecipia güei y remata el próximu vienres 3 de xunetu. En total van ser 8 les veces que se desenvuelvan hasta’l 21 d’agostu.

La conceyala d’Educación, Nuria Delmiro, visitó esti martes, a les 12 hores, les instalaciones del CEIP El Quirinal, onde tán teniendo llugar les actividaes d’esta primer vez de la TIA de branu, siempres so la normativa y protocolos sanitarios y sociales indicaos poles autoridaes competentes, y teniendo como exa principal nel so desenvolvimientu la protección y seguridá de les neñes y los neños.

Les inscripciones nel restu de veces d’esta edición de branu de la TIA siguen abiertes, tantu na modalidá online -encamentada preferentemente p’amenorgar la realización de trámites presenciales-, como de manera presencial, al traviés del Serviciu d’Atención Ciudadana municipal. Nesti últimu casu, tendrá de solicitase cita previa en http://www.aviles.es/citaprevia o nel teléfonu 985122100.

Como novedá nesta convocatoria, la conceyalía d’Educación amplió la posibilidá d’inscripción a los padres, madres o tutores que trabayen en modalidá a distancia. Hasta agora la convocatoria taba acutada a quien lo fixeren de manera presencial.

D’esta manera, el Conceyu d’Avilés amplía entá más la capacidá d’esti recursu para la conciliación llaboral y familiar, dando cabida a una realidá bien frecuente nos llares de resultes del amenorgamientu del trabayu presencial derivada de l’actual crisis sanitaria.

Más información

Tamién te podria gustar