Los sindicatos ven imposible amenorgar la interinidá al 8%

Los sindicatos d’educación ven imposible amenorgar la interinidá al 8% esta llexislatura. A los sindicatos Anpe, UXT, CCOO y Suatea nun-yos salen les cuentes y refuguen la propuesta de plantiya orgánica pal cursu 2020-2021 presentada no postrero de Xineru pola Conseyería d’Educación, na primer xunta de la mesa sectorial de negociación de personal docente.

La conseyería ufierta una plantiya de 9.378 puestos pal próximu cursu, lo que supon una medría de 140 places respecto al cursu anterior. Esta cantidá resulta «insuficiente» pa los sindicatos, qu’aseguren que «nun cubrir les necesidaes del serviciu» y nun dexa algamar l’oxetivu de llexislatura d’amenorgar la tasa d’interinidá del actual 30% hasta’l 8%. «De siguir a esti ritmu, van tardar 120 años en consiguilo», asegura’l secretariu del sindicatu d’Enseñanza de CCOO, Borja Llorente.

Nesti sentíu, el consensu de les organizaciones sindicales ye total. «Nun duldar de la bona voluntá de la conseyera cuando plantegó como oxetivu de llexislatura rebaxar hasta’l 8% la tasa d’interinidá, pero con esti planteamientu ye totalmente imposible», apunta la secretaria del Sector d’Enseñanza d’UXT, Maximina Fernández.

Dende UXT aportunen en que nun cuadren los númberos. «Si l’amenorgamientu de xornada a 18 hores en Secundaria suponía la creación de 417 places, nun entendemos cómo,  a la d’ellaborar les plantiyes, la Conseyería llogró una resultancia de solu 105 places», destaquen. Aseguren, amás, que «cola ellaboración d’esta plantiya esbardióse la posibilidá de modificar, d’una vegada por toes, l’agraviu comparativu al que ta sometíu’l personal de Primaria al nun consiguir l’amenorgamientu a 23 hores», y «realizar l’amenorgamientu de xornada de los docentes mayores de 55 años».

Per otru llau, los sindicatos reclamaron a la mesa técnica qu’especifique’l total de númberu d’allegamientos sobro les places que presentaron los centros. Nesti sentíu, critiquen «la negativa atayante de la Conseyería a detallales». El 4 de febreru celebrará una xunta de la mesa técnica, na que «esperamos poder analizar ún por ún los allegamientos de los equipos directivos», esplicó Rubio.