Portada Educación Los sindicatos piden responsabilidaes pol ‘hackeo’ de datos d’opositores

Los sindicatos piden responsabilidaes pol ‘hackeo’ de datos d’opositores

by redacción asturnews
Foto: amika san (https://www.flickr.com/photos/amika_san/)

Los sindicatos piden responsabilidaes pol ‘hackeo’ de datos de los opositores de primaria esta selmana, mentantu que la Conseyería d’Educación vieno acabante confirmar esti día qu’hubo un accesu indebíu al so servidor, del que yá se dio cuenta a l’Axencia de Protección de Datos.

Los voceros sindicales despacháronse a gustu esti martes cola Conseyería d’Educación, que sufrió un ‘hackeo’ del so servidor pol cual fueron publicaos los llistaos de los más de 5.000 aspirantes, col so baremu provisional. Fuentes de l’alministración confirmaron l’accesu indebíu», nel que tán trabayando lo servicios d’Informática del Principáu y del que yá se dio cuenta a l’Axencia de Protección de Datos.

Los fechos tuvieron llugar el llunes y suponse qu’el ‘hackeo’ producióse pela mañana y la información foi compartida a partir de primera hora de la tarde nos grupos de whastapp d’opositores. El documentu, de más de 4.000 páxines, contien nomes y apellíos, DNI, especialidá y baremu de tolos aspirantes que se presentaron a la primer prueba de la oposición pal cuerpu de Maestros, el pasáu 22 de xunu. Hai quien trata de restar importancia a asoceder por dos razones. De primeres, porque se trata del baremu provisional, non del definitivu. Ésti tenía de publicar ente güei y mañana pero, tres lo asocedío, va retrasase posiblemente hasta’l vienres. La cuestión ye que’l baremu (la puntuación que tien cada aspirante polos méritos profesionales y de formación y que se suma a la calificación del exame) nun se publica hasta dempués de conocese les notes de la segunda prueba pa evitar suspicacies y malos entendíos (qu’haya quien piense que’l tribunal puede favorecer a quien tien un baremu más altu, por casu). Y la segunda razón ye que, magar el baremu provisional nun se publica con tolos datos completos de los y les opositores, sí se fai col baremu definitivu. Esto ye, que sía como fora, a finales d’esta selmana sí se van publicar, con nome y apellíos y DNI, los baremos.

Por tollo, y porque lo asocedío «nun afecta n’absolutu al procesu y a les notes», dende ANPE, por casu, nun-y dan más importancia. Nun asocede lo mesmo con otros sindicatos. Borja Llorente, secretariu xeneral d’Enseñanza de CC OO, tien claro que se trata d’un problema de seguridá grave» que tien antecedentes n’Andalucía, cuando l’añu pasáu publicáronse tamién llistaos. Emma Rodríguez, de Suatea, tacha lo asocedío de «escandalosu».  Y pela so parte, Maxi Fernández, d’UXT, amuésase esmolecida polos derechos conculcados de los y les opositores tocantes a la publicación de datos personales y pide un castigu pa quien resulte responsable de la situación, si llógrase pescudar quién aportó al llistáu y compartir.

La Conseyería d’Educación fixo públicu un comunicáu nel que fala de los datos «indebidamente sopelexaos» y esclaria que nun tienen «validez nin fiabilidá», amás de recordar que «l’usu indebíu de datos supon una infracción llegal que puede ser castigada acordies con la normativa d’aplicación». Amás, la conseyería punxo la tema en manos del Serviciu d’Informática, que ta investigando lo asocedío.

Tamién te podria gustar