Los sindicatos de la enseñanza sofiten la manifestación pola oficialidá y denuncien la situación del asturianu nes escueles

Los sindicatos de la enseñanza d’Asturies: SUATE, FETE-UXT y la Federación d’Enseñanza de CCOO espublizaron güei un comunicáu nel que sofiten la manifestación pola oficialidá del asturianu ya’l so reconocimientu nel prósimu estatutu d’Autonomía que cellebra esti sábadu 24 de payares n’Uvieu el Conceyu Abiertu pola Oficialidá. Los sindicatos tamien denunciaren les carencies na escolarización de la llingua asturiana.

SUATEA, FETE-UXT y CCOO recordaren que la demanda d’escolarización na llingua asturiana volvió a medrar. Según los sindicatos namái un un 30 % de los docentes trabayen a tiempu completu en Llingua Asturiana y nun únicu centru, dominando la situación d’itinerancia en primaria (un 55 %) y la media xornada en secundaria (un 58%).

Los sindicatos anunciaron la so presencia na gran manifestación d’esti sábadu y reivindicaron delles cuestiones tocantes a la escolarización de la llingua asturiana que tan incumpliendose anguaño. D’esti mou piden en primer llugar la incorporación de la Llingua y la Cultura Asturiana al currículu d’enseñanza infantil, dalgo que, como recordaren les tres plataformes, la Conseyería nun tien previsto incorporar y que crea un conflictu evidente ente lo que se vive nel día a día y lo que se deprende na escuela.

En segundu llugar los sindicatos de la educación punxeren sobre la mesa la Eliminación de les ratio mínimes en tolos niveles pa la constitución de grupos de llingua asturiana y gallego asturiano. Esta situación, menos palpable en primaria, ta dafechu a la escontra de’l derechu a la escolarización que recueye la Llei d’usu. En Secundaria y Bachilleratu el problema ye mas grave al entrar en conflictu l’asturianu con segundes materies como l’ingles.

Esto na escuela pública porque na concertada la situación ye que namái tres centros tienen grupos d’asturianu n’activu, dalgo que fraya de nuevu dafechu la llei d’usu y que según los sindicatos discrimina claramente a los neños que quieran reforzar el so curriculum d’asturianu en favor de los que opten por reforzar otres asignatures, cuando les perres coles que se financien estos centros son públiques y de tolos asturianos.

SUATE, FETE-UXT y la Federación d’Enseñanza de CCOO tamien esixen la creación de la especialidá de Llingua Asturiana y Gallego-Asturiano nos Cuerpos de Maestros y Profesores d’Enseñanza Secundaria ya que esto fuí daque que’l el gobiernu asturianu prometió estudiar enantes que terminara l’añu 2006 y entá nun cumplió cuando ya tamos a lo cabero de 2007.