Portada Escéniques “Los ruios de la nueche” estrenase na torna del Teatru Familiar a Los Canapés

“Los ruios de la nueche” estrenase na torna del Teatru Familiar a Los Canapés

by redacción asturnews

El Teatru Familiar torna al Centru Sociocultural de Los Canapés col estrenu absolutu de “Los ruios de la nueche”, la más recién producción de la compañía asturiana Factoría Norte. Una creación d’Ánxeles Jiménez Soria, protagonizada Ana Morán y Sheila Montes, que podrá vese esti vienres, a les 18.00 hores.

La vida contemplada al traviés de los güeyos de dos neñes, qu’afayen el mundu al traviés de les ventanes de la so casa, comparten les medranes que s’apaecen al apagar la lluz de l’habitación y van enfrentase a conflictos que van aprender a resolver y superar xuntes. Esi ye l’argumentu d’esti estrenu absolutu del Teatru Familiar avilesín. “Los ruios de la nueche” ye la primera de los siete funciones programaes hasta xunu dientro del Teatru Familiar d’Avilés nos centros de Los Canapés, La Lluz y La Carriona.

Basada nel llibru homónimu d’Ánxeles Jiménez Soria ya ilustráu por Pablo Prestifilippo (con más de diez reediciones), que robla tamién la escenografía, la música tien una gran importancia nel desenvolvimientu de la hestoria, creada per Mar Álvarez, de bandes como Petit Pop o Pauline na sablera.

La resultancia ye un trabayu pa la primer infancia (encamentada a partir de los cuatro años, pero tamién pa tola familia), que la so esencia ye la creación d’universos tanto reales como ficticios, que se potencien dende la imaxinación, cola llave de la so permanencia na memoria de la niñez.

Les entraes, gratuites, pueden recoyese na taquilla del Centru Cultural de Los Canapés, teniendo de facilitar nel momentu los datos personales (nome completu, DNI y teléfonu) de los asistentes. L’aforu ye llindáu.

Conforme a les midíes de protección sanitaria, va ser obligatoriu l’usu de mázcaru, y va caltenese la distancia de seguridá. Coles mesmes, van esistir puntos con xel hidroalcohólico a disposición del públicu, y va ser imprescindible cumplir y respetar les indicaciones realizaes pol personal del centru, especialmente nes entraes y la salíes del mesmu.

 

Tamién te podria gustar