Portada Educación Los retos de la educación pasen por modernizar l’oficiu docente

Los retos de la educación pasen por modernizar l’oficiu docente

by redacción asturnews
María Isabel Celaá - Foto: La Moncloa - Gobierno de España (https://www.flickr.com/photos/lamoncloa_gob_es/)

La Ministra d’Educación, Isabel Celaá, vieno acabante afitar esta selmana pasada en diez oxetivos el futuru del sistema educativu tres la esperiencia del COVID y atalanta que los retos de la educación pasen por modernizar l’oficiu docente, el currículu y la Formación Profesional y reforzar el 0 a 3.

La crisis sanitaria del coronavirus punxo n’evidencia les virtúes y les faltes del sistema educativu español y les diferencies ente comunidaes. Y de too ello, almite la ministra Isabel Celáa, hai que sacar conclusiones. Les primeres: afitar les llínees de futuru pa la educación. Xunas llínees que pasen por diez oxetivos que Celaá esplicó mientres la so comparecencia na Comisión de Educaciónn y Formación Profesional del Congresu.

La esperiencia del COVID, la obligación d’atayar les clases prensenciales d’un día pa otru, el fechu de que casi 170.000 estudiantes n’Asturies prosiguieren el cursu dende les sos cases, «supunxo xuna estraordinaria prueba de estrés» pal sistema educativu, reconoz la ministra. Diz Celáa que nestos más de dos meses yá’l ministeriu afitóse trés llínees d’acción: «Curiar a les persones como principiu fundamental, afaer el sistema educativu a la necesidá de continuidá del aprendizaxe y coordinar coles Comunidaes Autónomes les actuaciones a realizar».

El nuevu sistema, la necesidá de reinventase nunos pocos díes, punxo de manifiestu la fienda dixital, la falta de ferramientes y conexones ente alumnos y profesores de tolos niveles, la escesiva dependencia de los conteníos y non de les competencies magar tolo dicho nes últimes reformes educatives y la dificultá de poner d’alcuerdu a toles comunidaes cuando elles tienen les competencies nesta materia. Ello ye que dalgunes se descolgaron del alcuerdu qu’afitó la forma na que se remataría esti cursu y les nueves normes d’evaluación y promoción.

Con too, el trabayu a futuru pasa por reformar el currículu, modernizalu pa garantizar la formación nes competencies que los estudiantes precisen desenvolver; modernizar l’oficiu docente pa impulsar la innovación curricular y didáctica; intensificar l’apueste pola digitalización del sistema educativu; modernizar la nuesa Formación Profesional; garantizar una educación en valores cívicos; personalización de la educación por que nengún talentu piérdase y amenorgar asina l’abandonu escolar; reforzar una Educación Infantil de 0 a 3 años calidable pa cerrar la fienda d’aprendizaxes que se produz n’etapes cimeres; siguir ameyorando la participación de la comunidá educativa na organización, el gobiernu, el funcionamientu y l’evaluación de los centros; ameyorar l’autonomía pedagóxica y organizativa de los centros y, finalmente, invertir n’I+D ya investigación educativa.

Tamién te podria gustar