Los profesores interinos van poder incorporase al plan d’evaluación docente en 2017

Los profesores interinos que cumplan los requisitos van poder incorporase’l próximu cursu al plan d’evaluación docente, un sistema d’incentivos económicos d’ente 132,18 y 206,53 euros mensuales, en cumplimientu de la sentencia dictada pol Xulgáu de lo Contencioso Alministrativu númberu 1 d’Uviéu.

El resolvimientu xudicial, dictose’l pasáu 10 d’ochobre y declarose firme tres la decisión de la Conseyería d’Educación de nun recurrila, envalorara’l recursu d’un interín qu’atropaba dieciséis años de serviciu y anula el resolvimientu alministrativu qu’escluyía a esti colectivu del plan pal cursu 2015/2016.

La inclusión d’esti colectivu pal próximu cursu foi anunciada esti llunes en rueda de prensa pol conseyeru d’Educación, Genaro Alonso, que cifró en redol a un millar el númberu de profesores que van poder vese beneficiaos por esta midida. Magar nun querer avanzar datos del presupuestu del so departamentu pa 2017, apuntó que l’anteproyectu pa la Conseyería yá contempla fondos pa encarar un gastu del qu’alvirtiera de que tendría “fuertes repercusiones” económiques cuando se fixo pública la sentencia.

El Xulgáu d’Uviéu sofitó la so decisión nun resolvimientu del Tribunal de Xusticia de la Unión Europea, que dictaminó que la esclusión de los interinos del plan d’evaluación docente, yera contraria a la directiva sobre’l trabayu de duración determinada. Nun autu en respuesta a una cuestión prejudicial plantegada pol maxistráu titular del Xulgáu de lo Contencioso- Alministrativu númberu 1 d’Uviéu, el TJUE alvertía de que la esclusión de los interinos ye contraria a la clausa cuarta de la directiva.