Los problemes del asturianu lleguen al Altu Comisionáu de los Drechos Humanos de la ONX

Un informe presentáu pola organización internacional European Language Equality Network (ELEN), de la que forma parte Iniciativa pol Asturianu como entidá representante de la llingua asturiana, lleva a la Oficina del Altu Comisionáu de los Drechos Humanos de la Organización de les Naciones Xuníes (ONX) la situación de violación de drechos humanos llingüísticos que viven n’Asturies los asturfalantes.

L’informe recueye los principales casos de discriminación y esplica l’estatus llegal del idioma asturianu, que nun tien reconocida la oficialidá magar les recomendaciones feches dende instituciones europees ya internacionales.

Ente les entidaes firmantes d’esti informe, que recueye casos asocedíos con toles llingües del estáu español tán, xunto a Iniciativa pol Asturianu, Acció Cultural del País Valencià, Plataforma per la Llengua, Societat Catalana de Sociolingüística, Kontseilua, A Mesa pola Normalización Lingüística, Escola Valenciana y el Consello d’a Fabla Aragonesa.

Esti informe, que na parte asturiana tuvo preparáu pola vocalía de Rellaciones Internacionales d’Iniciativa pol Asturianu, dirixida por Xosé B. Álvarez, va defendese en Xinebra, ell viniente mes de febreru de 2015, como parte de la revisión periódica que la OHCHR fai sobre’l grau de respetu a los drechos humanos nos países miembros de la ONX.