Portada Convocatories Los principales líderes sindicales apoyen la manifestación pola oficialidá del 21

Los principales líderes sindicales apoyen la manifestación pola oficialidá del 21

by redacción asturnews

Los líderes de los principales sindicatos asturianos apoyen la manifestación pola oficialidá del 21 d’abril, sigún vinieron asoleyando estos díes dende distintes organizaciones.

El 21 d’abril que vien, les cais d’Uviéu van ser testigos d’una manifestación masiva a favor de la oficialidá de la llingua asturiana y del gallego-asturianu qu’entama la Xunta pola Defensa de la Llingua Asturiana. Mentanto, la convocatoria, que va salir a les 12.00 hores de la Estación del Norte d’Uviéu, va sumando apoyos nuevos cada día.

Nellos, al traviés d’una semeya col cartel de la convocatoria, yá mostraron l’apoyu a la manifestación los líderes de los principales sindicatos asturianos. Ente ellos, el secretario xeneral de CC. OO. Asturies, José Manuel Zapico; el secretariu xeneral d’UXT Asturies, Javier Fernández Lanero; y el secretariu xeneral del SOMA, José Luis Alperi.

“Esta situación ye exemplu del cambiu xeneracional y de la llegada d’una fornada nueva de dirixentes que nun lleven al llombu los prexuicios de la xeneración anterior” sigún espardía esdti día la Xunta Pola Defensa de la Llingua nuna nota de prensa na que tamién afitaba qu’esti ye “un pensamientu que coincide col de la mayoría de la sociedá asturiana, como muestren toles encuestes y como vamos demostrar, otra vuelta, esti sábadu 21 d’abril n’Uviéu”.

Otra manera, tamién apoyaron publicamente la manifestación los sindicatos Corriente Sindical d’Izquierda (CSI), Suatea, Unión Sindical Obrera (USO) o la Conferencia Intersindical, amás de les secciones d’educación de cuasimente tol movimientu sindical asturianu.

Tamién te podria gustar