Los primeros intierros de la Sardina marquen la recta final del antroxu

08 febreru 03:49 2005 Imprimir

Don Carnal resístese a morrer. Los primeros intierros de la Sardina marquen a partir d’esta tarde la recta final del antroxu, que mañana quedará oficialmente soterráu na cellebración del Miércoles de Ceniza. Xixón despide güei la folixa, Avilés cellebra’l so desfile de mázcares y Uviéu prepárase pa garrar el relevu.

A partir de les 17 hores quedará habilitáu na Plaza Mayor de Xixón el veloriu de ‘Molinuca’, la Sardina que poco depués sedrá despidida xunta un antroxu que sorrayó’l centenariu’l Real Sporting. A les 19 hores saldrá’l contexu mortuoriu dica la plaza’l Marqués, onde se lleerá’l testamentu de la Sardina pa da-y l’adiós caberu darréu nel Muelle.

Miles de persones presenciaron ayeri’l desfile central d’antroxu en Xixón, qu’axuntó a neños y mayores nun recorríu marcáu poles baxes temperatures. Les mesmes que soportaron na Plaza Mayor los ciudadanos que siguieron les actuaciones de Jerónimo Granda -“l’alcaldesa de Xixón quier meyorar esta villa, pero tien una obsesión: antes muerta que sencilla”, cantó- y de Mojinos Escozíos, que protagonizaron un espectáculu con continuos guiños a la participación del públicu.

N’Avilés, onde anueche actuaron Las Niñas, el desfile cellebraráse a partir de les 18,30 hores de güei dende la cai José Cueto a la plaza’l Parche, a cuyu escenariu xubirá’l cantante brasileñu Vaudí. L’intierru de la Sardina pospónse pal miércoles de Ceniza, festividá que marca l’aniciu de la sobria Cuaresma, mientres los avilesinos esfruten güei d’una xornada de fiesta llocal al coincidir esti añu en domingu’l día de San Agustín, patronu de la villa.

Uviéu y Mieres prepársense yá pa garrar el relevu de la folixa antroxera, qu’en dambos casos centraráse nel fin de selmana y desendólcase con un programa enforma más discretu que los d’Avilés y Xixón. Una queimada popular y un conciertu de Los Berrones, na nueche’l vienres, sedrán el platu fuerte del antroxu na capital.

Con ocasión de les cellebraciones d’antroxu, el Muséu Nicanor Piñole de Xixón amuesa’l cuadru d’esi pintor ‘Entierro de la Sardina en el Puerto de Gijón’, que ta acabante ser mercáu por Caxastur a un coleccionista priváu y que ye la pieza de reclamu de la esposición ‘Visiones del Carnaval’, una amuesa que permanecerá abierta nel Muséu Piñole hasta’l 6 de marzu con cuadros, cartafueyos, cartelos ya invitaciones al rodiu de les cellebraciones d’antroxu na España de la Restauración.

Programa íntegru del antroxu n’Avilés

  Categories:
Loading Facebook Comments ...