Portada Lliteratura Los premios lliterarios n’asturiano del Principáu danse a conocer esta tarde n’Uviéu

Los premios lliterarios n’asturiano del Principáu danse a conocer esta tarde n’Uviéu

by asturnet

La sé de la Conseyería de Cultura n’Uviéu va acoyer esti xueves 15 a les 19.00 hores un actu nel que van dase a conocer los nomes de los ganadores de los premios Xosefa Xovellanos de Novela, Xuan María Acebal de Poesía y Enriqueta González Rubín de Periodismu. Na mesma ceremonia el director xeneral de Promoción Cultural y Política Llingüística, Carlos Madera, va facer entrega de los galardones.

El premiu Xosefa Xovellanos de novela llega con ésta a la so XXVI edición y a él podíen presentase obres inédites y sin premiar n’otros concursos, escrites en llingua asturiana y con una estensión mínima de setenta y cinco fueyes. Ta dotáu con 6.000 euros. El premiu Xuan M.ª Acebal algama la XI edición y tá empobináu a premiar poemarios con una estensión mínima de quinientos versos. La so dotación ye tamién de 6.000 euros.

El premiu Enriqueta González Rubín celebra esti añu la so III edición y convócase en dos categoríes: a) Periodismu escritu, pa trabayos publicaos en periódicos y revistes ente’l 1 de xineru y el 30 d’ochobre, dotáu con 2.000 euros; b) Periodismu audiovisual, pa emisiones radiofóniques o televisives de tema llibre y de cualquier xéneru emitíos nes mesmes feches y con una dotación de 4.000 euros.

Tamién te podria gustar