Los políticos participen na Xunta na Selmana les Lletres

06 mayu 10:43 2009 Imprimir

La Xunta celebró esti miércoles la tradicional ‘Llectura de testos lliterarios n’asturianu’, dientro de la Selmana de Les Lletres, a les 13 hores nel Salón Europa del Parlamentu. Pilar Alonso, Benjamín Gutiérrez, Ovidio Sánchez, Joaquín Aréstegui, Alfonso Román, Emilio Pérez Cueva, Elma Alonso, Cristina Coto, Jesús Iglesias, Emilia Vázquez y Diana Camafeita, foron dellos de los parlamentarios asturianos que participen de la llectura, xunta diputaos por Asturies nel Congresu y senadores como José Manuel Cuervo, Pilar Fernández Pardo o Dorinda García.

L’actu presentólu la presidenta de la Xunta Xeneral, María Jesús Álvarez González, qu’entamó la llectura con ‘Adosina’, de Chechu García, y destacó la “necesidá de promocionar y difundir la nuestra llingua”.

Darréu siguieron lleendo la Conseyera de Cultura, María Mercedes Álvarez, y el Conseyeru d’Educación, José Luis Iglesias Ripoedre, qu’escoyó ‘Alcordances de mio güela’, de María Luz Pontón; la Conseyera de Bienestar Social, Noemí Martín, que lleería ‘Apocalipsis’, de Dolfu Camilo; y el de Sanidá, José Ramón Quirós, que dió llectura nun perbon asturianu a de ‘Fuxida’, d’Esther García López.

El diputáu del PP, Joaquín Aréstegui lleía al poeta de LLanera Héctor Pérez Iglesias y Jesús Iglesias a Xavier Frías Conde, mentantu qu’Emilio Pérez Cueva lleía ‘Na alcordanza’, de Xurde Fernández, Alfonso Román “La Forxa del héroe”, de Xuan Santori y Cristina Coto un testu de Marián García.

Los testos escritos n’asturianu que se lleíen tán incluyíos nuna publicación editada pola Xunta Xeneral del Principáu con motivu d’esta celebración, baxo’l títulu ‘Caminos que naide triara’. La publicación contién un total de 45 microrrelatos escritos por otros tantos autores asturianos, especialmente pa esta ocasión.

  Categories:
Loading Facebook Comments ...