Portada Educación Los partíos certifiquen el fallecimientu del pactu educativu

Los partíos certifiquen el fallecimientu del pactu educativu

by redacción asturnews

La posibilidá d’algamar n’España un pactu d’Estáu pola educación, un gran alcuerdu políticu y social que dexara aprobar per primer vegada en democracia una llei consensuada que modernizara y diera estabilidá al sistema, dase por descarriláu.

Les negociaciones en busca d’esti alcuerdu, que s’empecipiaron hai más d’un añu nel Congresu, quedaron mancaes de muerte va una selmana, cuando’l PSOE anunció la so marcha de la subcomisión onde se desenvuelven, portada agravada solo un día dempués pola salida tamién de les conversaciones de los representantes de Xuníos Podemos. La imposibilidá material del pactu, sicasí, certificóse esta selmana cuando la llista d’abandonos del foru negociador amontose colos anuncios de la salida de les conversaciones d’ERC, PNV y PdeCAT.

La suma d’abandonos significa que solo se caltienen nes conversaciones en busca d’un consensu educativu PP y Ciudadanos y que, poro, yá tán al marxe de les negociaciones les sigles que representen a más de la metá de los diputaos, la mayoría del Congresu.

La xunta de la Mesa y Voceros de la Comisión d’Educación nel  últimu intentu de PP y Ciudadanos por que los socialistes reconsideraren la so postura, terminó cola certificación per parte del partíu de Pedro Sánchez de que nun va volver a la subcomisión, lo que bastió l’abandonu de los nacionalistes, que nun ven sentíu dalgunu a allargar los alcuentros, pos coinciden en qu’ensin la presencia del primer partíu de la oposición ye imposible un alcuerdu d’Estáu, que per otra parte los trés vieron con gran escepticismu llograr dende’l primer día.

El PSOE, según confirmó, solo va replantegase la so vuelta si’l Gobiernu comprometese por escritu a que l’alcuerdu vaiga garantizar unu financiamientu mínimu del 5% del PIB pa colexos ya institutos, lo que supón aumentar la inversión 1.500 millones añales hasta 2025, ufierta que, aseguren, nun recibieron. El restu de partíos, según indicaron, nun va volver tampoco a les xuntes sacantes la posibilidá d’un pactu d’Estáu vuelva ser vidable porque les negociaciones incluyan a los grandes partíos estatales.

 

Tamién te podria gustar