Los padres de la escuela pública piden que s’esanicien los deberes

La Confederación d’Asociaciones de Padres y Madres d’Alumnos (Ceapa), que representa a 12.000 asociaciones de families de los centros públicos, quier que los alumnos nun tengan deberes “obligatorios” fora de la so xornada escolar.

Los padres piden un alderique fondu” sobre esta actividá y sobre el calendariu de clases de los estudiantes, según desplicaba esta selmana Jesús Salíu, presidente de Ceapa, na rueda de prensa de valoración del entamu de cursu, que calificaron como “caóticu”. La LOMCE (Llei Orgánica pa la Meyora de la Calidá Educativa) estiéndese esti mes de setiembre a tolos cursos de primaria, los impares de secundaria y 1º de bachilleratu de tol Estáu.

La confederación de families considera que los deberes “xeneren una presión institucional pa escontra l’alumnáu”.  Según les sos estimaciones de la Ceapa, les xornaes que soporten los estudiantes pueden llegar a 60 hores selmanales.

Los padres encamienten a los políticos que faigan un alderique fondu sobre los tiempos escolares, el calendariu y los tiempos d’exames y que se cumpla “íntegru” el periodu de clases, con una media de 175 díes añales pero con variaciones por comunidaes autónomes. La Ceapa reclama que los descansos nun tean supeditaos “a feches relixoses”. Proponen adelantrar a xunetu los exames de setiembre y que s’impartan clases de sofitu demientres el mes de xunu, ente los díes nos qu’acaben les clases y los que son los exames finales.

Talamente como lo vieno faciendo’l Defensor del Pueblu o tamién el Conseyu Escolar del Estáu, la Ceapa reclama la gratuidá de los llibros de testu pa les families. Defenden los sistemes de préstamos y la reutilización de los manuales, como asocede nel casu de Navarra.