Los Óscar nun van esixir a les candidatures estrenar en cines

L’Academia de Hollywood modificó esti selmana pasada’l reglamentu pa los Premios Óscar pola crisis del coronavirus y aprobó una esceición que va dexar que les cintes que nun se proyectaron en cines puedan ser candidates.

“Hasta nuevu avisu, y solo pa la 93 edición de los Premios, les películes que teníen planiáu un estrenu en cines, pero qu’antes tean disponibles nun serviciu d’emisión dixital -streaming-, van poder ser elegibles pa les categoríes de meyor película, los apartaos xenerales y d’especialidá”, informó l’Academia nun comunicáu unviáu a Efe.

Tratase de la primer vegada que la organización  de los Óscar apuerten a esta midida, que va dexar d’aplicase una vegada que les autoridaes federales, estatales y locales dexen la reapertura de cines. “L’Academia cree firmemente que nun hai meyor manera d’esperimentar la maxa de les películes que veles nun cine. El nuesu compromisu con eso nun camudó y ye infrayable. Sicasí, la hestórica y tráxica pandemia por COVID-19 precisa aplicar esta esceición temporal a les nueses riegles”, dixo’l presidente de la institución, David Rubin.

El cambéu del reglamentu añede dos puntos alcordaos nun conceyu de la Xunta de Gobernadores de l’Academia, celebrada en Los Ánxeles (EE.XX.). Per un sitiu, la cinta tendrá de tar disponible nun serviciu d’emisión dixital quitáu pa tolos miembros de l’Academia mientres 60 díes dende’l so estrenu n’internet. Pol otru, va tener que cumplir con tolos demás criterios de elexibilidá.

Hasta agora, la normativa esixía que les cintes aspirantes a los Óscar proyectáranse en cines del condáu de Los Ánxeles y mientres siquier siete díes consecutivos, daqué que, por casu, Netflix tuvo que faer por que “Roma” y “Marriage Story” entraren en concursu. Por cuenta de la incertidume pol coronavirus y a que les autoridaes de California tán aplicando unes de les midíes de contención más severes de too Estaos Xuníos, l’Academia esanició esi requisitu esclusivu.

Coles mesmes, les esceiciones aprobaes van aplicar a tolos estrenos programaos en festivales que nun se pudieron celebrar de forma física, como’l de Cannes, qu’entá estudia formatos alternativos. Na xunta aprobóse la supresión d’una categoría al combinar el premiu a la edición de soníu col de la meyor entemez de soníu, lo qu’asitia en 25 el total d’estauínes apurríes.

Tamién, per primer vegada, tolos miembros de l’Academia van ser convidaos a participar na ronda preliminar de votación pa llargumetraxes internacionales, siempres que cumplan con un requisitu mínimu de visualizaciones pa poder votar.