Los mozos con carné d’albergues van pagar la metá en 16 museos

Los mozos con carné d’albergues van pagar la metá en 16 museos
13 agostu 20:03 2016 Imprimir

El Ministeriu d’Educación, Cultura y Deporte y la Rede Española d’Albergues Xuveniles (REAJ) roblaron esta selmana un conveniu de collaboración que va dexar a los usuarios del carné de alberguista esfrutar d’un descuentu del 50 per cientu na entrada de dieciséis museos nacionales.

Con esti alcuerdu, la REAJ y el Ministeriu busquen promocionar, al traviés de los albergues, l’espardimientu del patrimoniu históricu y la visita a los museos ente los mozos, según detalla güei la Secretaría d’Estáu de Cultura nun comunicáu. L’Arqueolóxicu, Altamira, la Casa de Cervantes, el Nacional d’Escultura o’l d’Arte Romano son dalgunos de los centros nacionales que van rebaxar el preciu de la so entrada xeneral

“Anguaño cuntamos con más de 100.000 socios n’España y 290 albergues disponibles en territoriu nacional”, afirma Laura Puga del departamentu de comunicaciones de la REAJ. La rede pertenez a Hostelling International, lo que pon a disposición 4.000 agospeos en más de 90 países pa tolos afiliaos. Los miembros estranxeros tamién pueden beneficiase del descuentu del 50 per cientu na entrada a los museos con solo presentar la acreditación de la so organización alberguista.

Pa solicitar el carné de la Rede Española d’Albergues Xuveniles solo precísase presentar el DNI o pasaporte, tener 14 años d’edá y pagar la tasa de seis euros. A partir de los 30 años d’edá’l costo aumenta a 13 euros, y esiste un plan pa grupos (a lo menos 10 persones) quien abonen 16 euros en total. El carné anuévase añalmente y adquierse nos puntos de vientes n’España y en llínea na web en www.hostelpack.com.

Los museos que participen nel programa son el Muséu Nacional d’Arqueoloxía Subacuática (ARQUA), Muséu Arqueolóxicu Nacional, Muséu Cerralbo, Muséu d’América, Muséu del Traxe, Muséu Nacional d’Antropoloxía, Muséu Nacional d’Artes Decoratives, Muséu del Romanticismu, Muséu Sorolla, Muséu Nacional d’Arte Romano y Muséu Nacional y Centru d’Investigación de Altamira, Muséu del Greco, Muséu Sefardín, Muséu Nacional de Cerámica y de les Artes Suntuarias ‘González Martí’, Muséu Casa Cervantes y Muséu Nacional d’Escultura.

  Categories: