Los móviles con Windows nun van ser a usar WhatsApp dende xunetu

Los móviles con Windows Phone como sistema operativu nun van ser a usar WhatsApp dende’l día primeru de xunetu, sigún vieno acabante de dar auncia WhatsApp.

Va un mes y mediu, WhatsApp anunció que la plataforma de mensaxería instantánea dexaría de funcionar en dellos dispositivos. Primeramente paecía que l’aciar fecha sería a finales d’añu. Sicasí, esta midida adelantróse y va aplicase a partir del próximu 1 de xunetu nos teléfonos de Microsoft que funcionen col sistema operativu Windows Phone, según anunció WhatsApp.

El sistema operativu Windows Phone llanzose n’ochobre del 2010, pero, unos meses tras, en xineru del 2019, Microsoft anunció que yá nun fadría más actualizaciones pal ‘software’ a partir del 10 d’avientu del 2019. Lo cierto ye que Windows Phone nunca llogró l’ésitu que llograron los sos rivales directos, nin foi del presto de los desarrolladores d’aplicaciones.

L’aplicación de WhatsApp nestos dispositivos va dexar de funcionar antes, a partir del 1 de xunetu. De la mesma, WhatsApp tamién va dexar de funcionar en versiones antigües de dellos sistemes operativos. En concretu, nes versiones anteriores a iOS 7 (llanzáu nel 2014) y anteriores a Android 2.3.7 (llanzáu nel 2011), la plataforma yá nun dexa crear cuentes nueves nin verificar les yá esistentes. Estes solo van poder utilizase hasta’l 1 de febreru del añu que vien. La compañía de mensaxería móvil, propiedá de Facebook, avisó que, al dexar de desenvolver l’aplicación pa estos sistemes operativos, dalgunes de les sos funciones podríen dexar de funcionar en cualquier momentu.

Anguaño WhatsApp cunta con más de 1.500 millones d’usuarios en tol mundu. Sicasí, esta cifra va vese amenorgada significativamente cuando l’aplicación dexe de funcionar nos dispositivos Microsoft.