Portada Educación Los llibros y l’asturianu van protagonizar la Selmana Cultural de La Salle de Xixón

Los llibros y l’asturianu van protagonizar la Selmana Cultural de La Salle de Xixón

by asturnet

El Colexu San Eutiquio dedica esti añu la so Selmana Cultural al llibru, y con esti motivu entama una esposición bibliográfica asina como un conxuntu d’actividaes que van a contar cola presencia de destacaos autores asturianos. La Selmana Cultural desarrollaráse los díes 21 a 25 de xineru nel centru educativu, que ta asitiáu nel barriu xixonés de Cimavilla. Ente los conferenciantes van tar Aurora García Rivas, Daniel García de la Cuesta, Humberto Gonzali ya Inaciu Galán, ente otros.

La selmana va entamar esti llunes con un tiempu pa la reflexón que va abrise cada día y que la primer xornada va dedise a “¿Por qué ye importante la llectura?”. A les 12.30 va producise la inauguración oficial de La Selmana Cultural cola presencia de Justo Vilabrille Linares, Conceyal d’Educación y Cultura del Ayuntamientu de Xixón y d’Humberto Gonzali, escritor y xestor cultural, amás del director del Colexu y la coordinadora del departamentu de lliteratura del mesmu. A la una la tarde va abrise la esposición sobre llibros que preparó’l centru.

El martes la reflexón va titulase “El Cementeriu de los Llibros Escaecíos” y a les nueve y diez de la mañana va ser Aurora García Rivas, escritora en castellanu y gallego-asturianu, la qu’entame les charres con “Averándose a la poesía”. A les 11.00 hores pieslla’l día un “Conciertu didácticu de Música Tradicional”, con Daniel García de la Cuesta , miembru del grupu folk Lliberdón, investigador, concertista y conferenciante de temática tradicional.

El miércoles 23 la reflexón va xirar alredor de “Pa entender matemátiques ha lleese”. Y a les 11.00 hores entama la xornada de conferencíes con “L’humor gráficu y el Cómic n’Asturies” con Ernesto García del Castillo “Neto”, dibuxante y humorista gráficu de La Voz de Asturias, pa zarrase dempués, a les 12.30 hores, cola conferencia “Cómo llegar a ser empresariu cultural “, con Inaciu Iglesias, empresariu, editor y escritor.

El xueves 24 entama cola reflexón “Carta a un neña que nun quier lleer”. A les once la mañana l’escritor y presentador de la TPA y la Cadena SER, Inaciu Galan y Gonzalez, va entamar una charra titulada “Facer televisión n’asturies”, na que va poder vese un documental preparáu por alumnos del centru y pol propiu autor a costafecha pa la ocasión y nel que se pue ver el procesu de realización del so programa de la TPA, “Al Aldu: Xente de Casa”. Esi mesmu día, a les doce y media la mañana escritor, etnógrafu, dibuxante ya ilustrador Alberto Álvarez Peña va falar de los “Mitos del Conceyu de Xixón”.

L’últimu día de la selmana cultural va abrise con una reflexón sobre “Los llibros…”, a la que va siguir, a les 11 hores una segunda sesión de la charra d’Inaciu Galán “Facer televisión n’asturies”, que va repetir la charra del xueves pa dellos alumnos más del centru.

Tamién te podria gustar