Los llibreros españoles xúnense pa demandar a Amazon

by redacción asturnews | diciembre 5, 2019 4:30 pm

La Confederación Española de Gremios y Asociaciones de Llibreríes (CEGAL) va demandar “nos próximos díes” a Amazon por frayar la Llei del Llibru de 2007 n’aplicando descuentos del 25 per cientu, tal que anunció’l so director técnicu, Javier López, mientres la presentación del Observatoriu de les Llibreríes.

Tal que indicó mientres la presentación, los llibreros van presentar una denuncia alministrativa contra la campaña que ta a valir anguaño y qu’ufierta un 25 per cientu de descuentu en “una relación llindada de títulos”. Amás, tán estudiando los siguientes pasos a dar.

En concretu, la campaña a la que fai referencia CEGAL empezó’l pasáu 6 de payares y va caltenese hasta’l 2 d’avientu, con descuentos del 25 per cientu n’una selección de llibros “puramente a llibros vendíos por Amazon” y “publicaos hai más de dos años y ufiertaos mientres seis meses”.

Pa los llibreros, esta campaña “nun ye llegal” y atiense a un puntu de la Llei del Llibru que, al so xuiciu, “ta fechu pa otros casos”, nos que la llibrería tien “bien pocos exemplares de dalgún llibru que tien n’esistencies”, de que la so última edición pasaron dos años y que tuvo n’esposición mientres seis meses.

En concretu, l’artículu 10 de la Llei del Llibru de 2007 señala que “el llibreru o detallista va poder aplicar precios inferiores al de vienta al públicu a los llibros editaos o importaos trescurríos dos años dende la última edición siempres que fueren ufiertaos polos mesmos mientres un períodu mínimu de seis meses”. Tal qu’indica, “la ufierta y esposición d’estos llibros tendrá de realizase separada y abondo indicada de la de los llibros suxetos a preciu fixu”.

El director técnicu de CEGAL reconoció que l’actual llei, aprobada en 2007, data d’un momentu nel que “el pesu de les grandes plataformes tecnolóxiques yera otru” y “la vienta per internet yera otra cosa”. Nesti sentíu, reconoció que “precisa una adaptación o cenciellamente qu’haya una aclaración o planteamientu dende’l puntu de vista xurídicu que garantice que respuende al espíritu de la llei lo que puede realizase dende les llibreríes, físiques o on line”.

Pela so parte, la subdireutora xeneral de Promoción del Llibru, laLectura y les Lletres Españoles, Begoña Cuetu Prada, señaló que van encetar esta tema “con prudencia” y “enforma consensu” porque la Llei del Llibru contempla “una serie de supuestos d’esclusión del preciu fixu”. “A priori paez que tou se respetó”, afirmó.

Source URL: http://asturnews.com/los-llibreros-espanoles-xunense-pa-demandar-a-amazon/