Portada Música Los Jo No Kognos sedrán la voz del friulanu nes festival Liet International

Los Jo No Kognos sedrán la voz del friulanu nes festival Liet International

by asturnet

Los Jo No Kognos son una banda de folk rock en llingua friulana, caracterizada por sonoridaes rítmiques dacuando melódiques. Les sos lletres tratan d’amistá, marxinación, amor y odiu. El grupu, compuestu por Luca D’Angela (voz y guitarra), Simone Mariotti (guitarra), Mauro Pontisso (baxu), Luca Morassutti (percusión) y Stefano Locatelli (batería), forma parte del sellu independiente Musiche Furlane Fuarte. Nel 2002 ganaron los premios Friul y depués foron nominaos a los premios Tor. Grabaron dos álbumes,Liendis y Discolcj, y producieron dellos vídeos musicales, amás de tocar per tola rexón. Con Mai mai esperen llevar el premiu pa la so llingua.

Asturnew sigue asina col repás a los participantes del Liet International, el conocíu como Eurovisión de les llingües minorizaes, qu’esti añu llega a Asturies. Ye la primer vegada nos diez años del festival en qu’esti va celebrase na Península.

La llingua friulana ye un idioma románicu, familia directa del romanche y el lladinu, que se falen nos Alpes centrales. Fálase en Friuli, rexón italiana asitiada na frontera noroeste d’esti estáu européu. Ta regulada pol Osservatori Regjonâl de Lenghe e de Culture Furlanis y reconocíu pol estáu italianu como llingua oficial, anque de forma mui parcial, dende 1999. Cunta con 720.000 falantes.

Esta ye la torna al asturianu del cantar:

NUNCA NUNCA

Lletra: Luca D’Angela

Música: Luca D’Angela

Nunca, nunca te sintieres asina,

nunca, nunca, dime la verdá.

Vamos, vamos, una lluz va rellumar

perriba los años

perriba l’home que pensabes que yeres

o perriba de lo queda d’él.

Ai, ai, pue dicime daquién

si namás los llocos piensen como yo.

Nunca, nunca, naide va cuspir

perriba los años

perriba l’home que pensabes que yeres

o perriba de lo queda d’él,

la felicidá nunca vien a escontrate,

la felicidá fuxe.

Nunca, nunca me sintiera asina,

nunca, nunca, esa ye la verdá.

Vamos, vamos, una lluz va rellumar

perriba los años

perriba l’home que pensabes que yeres

o perriba de lo queda d’él,

la felicidá nunca vien a escontrate,

la felicidá fuxe.

Tamién te podria gustar