Los itinerarios del programa “Pequeños investigadores” d’Avilés volverá’l próximu cursu escolar

Los itinerarios didácticos del programa “PAMUA Pequeños investigadores” d’Avilés volverá entamar el próximu cursu escolar siempres atendiendo a los encamientos de la Conseyería d’Educación y los protocolos establecíos poles Autoridaes Sanitaries.

En marcha l’actividá “Villa Ensueño”, un montaxe virtual nel qu’escolares de 11 centros van lleer versos d’esta obra de Marcos del Torniello qu’epondera l’Avilés de finales del XIX y entamos del XX. L’escape room virtual “El retu PAMUA: Pedro Menéndez”, ellaboráu por alumnáu del CEE San Cristóbal, convida al restu de centros a redescubrir la figura del marín de manera interactiva

El programa “PAMUA Pequeños investigadores”, qu’inclúi la realización d’itinerarios didácticos pa escolares sobro’l patrimoniu históricu artísticu d’Avilés, va volver a entamar mientres l’entamu del próximu cursu escolar. Asina lo alcordó’l Serviciu d’Educación del Conceyu d’Avilés colos centros educativos de la ciudá.

D’esta miente, mientres l’entamu del cursu 2020/2021 van poder llevase a cabu los itinerarios que quedaron pindios, y que la so realización taba programada mientres el tercer trimestre del cursu 2019/2020. Sicasí, la so realización va depender en tou momentu de los encamientos de la Conseyería d’Educación del Principáu d’Asturies, lo mesmo que de los protocolos establecíos poles autoridaes sanitaries.

La conceyala d’Educación, Nuria Demiro, señala que “numberoses actividaes entamaes dende’l Serviciu d’Educación tuvieron que quedar suspendíes debíu al COVID-19”. Dalgunes, como ye’l casu de ‘PAMUA Pequenos investigadores’ “van podese volver a entamar el próximu cursu, y otres hanse afechu a les circunstancies, y coordínense y espublicen de forma virtual”. Ye’l casu de les actividaes “Villa Ensueño” y l’escape room “Retu PAMUA Pedro Menéndez”.

L’actividá ta anguaño en marcha y trata d’averase a los y les escolares al Avilés de finales del sieglu XIX y empiezos del XX, al traviés de la obra homónima de Marcos del Torniello. Alumnáu d’once centros educativos participa na ellaboración d’un montaxe virtual dando llectura a los versos d’esta obra poética.

Los once centros participantes son los CEIP Virxe de les Marees, Palacio Valdés, Marcos del Torniello, Apolinar García Hevia, Sabugo, La Carriona, Marcelo Gago, Enrique Alonso, Llaranes y El Quirinal; y el Centru d’Educación Especial San Cristóbal.

Mientres el presente curso, el proyectu “PAMUA Pequeños investigadores” centrárase na celebración del centenariu de la construcción del Teatru Palacio Valdés y, arriendes d’ello, na hestoria del Avilés del sieglu XIX y entamos del sieglu XX. L’actividá “Villa Ensueño” escuerre polo tanto reforzar la conocencia per parte del alumnáu d’esta dómina tan decisiva pa la ciudá, cavilgando sobro la importancia de conocer el pasáu pa encarar el futuru, y estudiando cómo se forxó la identidá cultural d’Avilés.

Más información